Pas 60 vitesh, botohet libër me poezi të poetit dhe myderrizit nga Shkupi Fettah Efendi

Kryetari i shoqatës “Fettah Efendi” tha se do të botojnë vëllime dhe libra të rinj gradualisht në periudhën e ardhshme

Nëpërmjet një programi, sot në Shkup u realizua promovimi i librit me titull “Përsëri për atdheun”, me poezi të poetit dhe myderrizit nga Shkupi Abdulfetah Rauf, i njohur si Fettah Efendiu, raporton Anadolu Agency (AA).

Në programin e mbajtur në Hamamin Davut Pasha, morën pjesë ish-kryetari i Gjykatës Kushtetuese të Maqedonisë së Veriut, Salih Murat, kryetari i nderit i Lidhjes së Poetëve të Turqisë, Mehmet Doğan, kryetari i Lidhjes së Organizatave Joqeveritare Turke të Maqedonisë (MATUSITEB), Hüsrev Emin, përfaqësues të institucioneve dhe organizatave turke në vend dhe të ftuar të tjerë.

Pas recitimit të Kuranit të Shenjtë në program, u lexuan pjesë të poezive të Fettah Efendiut.

Sevba Abdula, kryetari i Shoqatës për Edukim dhe Mendim “Fettah Efendi”, u tha gazetarëve para programit se ata kanë kryer kërkime në këtë drejtim për dy ose tre vjet dhe se kanë mësuar se poezitë e Fettah Efendiut kishin emra të ndryshëm dhe ishin të shpërndara, duke shtuar se ata kanë kaluar në periudha të vështira në procesin e botimit të një libri.

Duke theksuar se poezitë ishin të pabotuara për 60 vjet, Abdula tha: “Falë Zotit, ne i siguruam këto poezi dhe fletoret e poezive nga djali i Muhamed Aruçit në fillim të këtij viti. Pas asaj dite, gjetëm mbi 1.000 poezi duke punuar shumë seriozisht. Disa poezi ende gjenden të shpërndara në mesin e njerëzve. Ne kemi bërë shumë përpjekje për të botuar këtë libër me poezi në mënyrë që të rrisim ndërgjegjësimin”.

Ai tha se do të botojnë vëllime dhe libra të rinj gradualisht në periudhën e ardhshme, duke shtuar se mendojnë që përfundimin e kësaj pune ta bëjnë duke mbajtur një simpozium të madh në 60-vjetorin e vdekjes së Fettah Efendiut.

– “Fettah Efendiu, urë nga këto troje që vazhdon deri në Turqi”

Mehmet Doğan, kryetar nderi i Lidhjes së Shkrimtarëve të Turqisë, tha se Abdulfettah Rauf ishte një figurë, dijetar dhe shkrimtar që u rrit dhe jetoi në këtë rajon dhe prodhoi vepra.

Ai shpjegoi se nuk kishin shumë njohuri për historinë shkencore dhe letrare të rajonit pas Luftës Ballkanike.

“Në fakt, kur njohim Fettah Efendiun, ne bëjmë një hap para drejt njohjes së jetës shkencore dhe letrare të këtyre trojeve nga vitet 1910 deri në vitet 1950 dhe madje edhe në vitet 1960. Kur lexuam poezitë e Fettah Efendiut, kur pamë veprat e tij, ai ishte vetëm një emër për ne. Kështu që kur erdhëm këtu, miqtë na thanë se një personalitet i tillë jetoi dhe shkroi poezi në stilin e Mehmet Akifit, por ne nuk ishim në dijeni të veprave të tij. Tani, për herë të parë, sot, si fillim, kemi një libër me poezitë e tij”, tha Doğan.

Ai e cilësoi Fettah Efendiun si “një urë nga këto troje që vazhdon drejt Anadollit dhe Turqisë”.

– “E kemi borxh ta përkujtojmë Fettah Efendiun”

Ndërkohë, ish-kryetari i Gjykatës Kushtetuese të Maqedonisë së Veriut, Salih Murat, e quajti si “borxh i ynë” përkujtimin e figurës së Fettah Efendeiut.

Ai tregoi se Fettah Efendiu dhe miqtë e tij u gjykuan në një rast të rremë në vitin 1947.

“Vetëm pse mbrojtën veten, identitetin dhe atë që e bën Shkupin Shkup, ata shkuan si viktima si organizatë ‘Juxhel’. Pas një gjyqi të shkurtër dyditor, Fettah Efendiu u burgos për shtatë vjet dhe të drejtat e tij politike iu morën për tri vjet. Ai kishte edhe shokë të tjerë në këtë rast dhe ata morën dënime më të ulëta”, u shpreh Murat.

Duke vënë në dukje se ai mori një dënim të pamerituar duke pasur parasysh konjukturën ligjore të asaj periudhe, Murat tha se regjimi i asaj periudhe qëronte hesapet me elementët turko-muslimanë të asaj kohe sepse kishte autoritet të madh.

“Rezistenca e tij dhe qëndrimi i tij janë shumë të rëndësishme për ne. Vlerat që ai mbrojti janë vlerat tona sot”, shtoi Murat.

Ndryshe, në librin e botuar nga “Botimet IDEFE” në kuadër të shoqatës “Fettah Efendi” ka 37 poezi.

– Kush është Fettah Efendiu?

Abdulfettah Rauf, poet dhe myderriz, ka lindur në vitin 1910 në Shkup dhe njihet se Fettah Efendiu.

Në shumicën e poezive të tij, ai ka shprehur mallin dhe pikëllimin e tij për trashëgiminë e qytetërimit osman.

Sidomos pas Luftës së Dytë Botërore, ai kundërshtoi emigrimin nga Jugosllavia në Turqi, duke thënë se ky emigracion nuk ishte i lejueshëm fetarisht, pikëpamje të cilën e shprehu me poezitë e tij.

Fettah Efendiu konsiderohet si një nga poetët e brezit të fundit që shkroi në turqishten osmane dhe përdori prozodinë arabe (aruz).