Historia e Nemesio Oseguera Cervantes, i njohur si “El Mencho”, përfundoi në orët e para të mëngjesit të së dielës në pyjet e Tapalpës, Jalisco. Pas katër dekadash në botën e krimit dhe ndërtimit të perandorisë Cartel Jalisco Nueva Generación (CJNG), trafikanti më i kërkuar në botë u vra gjatë një operacioni të forcave speciale të Ushtrisë Meksikane.

Vendndodhja e tij u përcaktua falë një procesi të gjatë inteligjence, i mbështetur edhe nga informacione plotësuese prej SHBA-së. Ironikisht, ashtu si në rastin e “El Chapo” Guzmán, ishte vizita e të dashurës ajo që zbuloi strofullën e tij.

Ndonëse “El Mencho” mbrohej me masa të rrepta sigurie, në momentin e sulmit ai shoqërohej vetëm nga rreth dhjetë truproja të besuar. Ushtria rrethoi kabinat ku fshihej krimineli me mbështetjen e gjashtë helikopterëve dhe dy avionëve.

Megjithëse qëllimi fillestar ishte arrestimi, truprojat hapën zjarr. Gjatë përleshjes, mbetën të vrarë tetë kriminelë. El Mencho u përpoq të arratisej në këmbë përmes shkurreve, i armatosur me një raketahedhës, por u plagos rëndë gjatë shkëmbimit të zjarrit me forcat speciale.

Ai vdiq gjatë transportit me helikopter drejt Morelias, për shkak të rrezikut të lartë që paraqiste dërgimi i trupit të tij në Guadalajara, bastionin e kartelit. Vdekja e liderit shkaktoi një valë dhune të paprecedentë.

Krahu i tij i djathtë, “El Tuli”, organizoi bllokime rrugësh dhe sulme ndaj ushtrisë, duke ofruar deri në 1.100 dollarë për çdo ushtar të vrarë. Karteli ngriti 252 postblloqe në 20 shtete të Meksikës, duke djegur biznese dhe automjete.

Bilanci i fundjavës ishte tragjik: 72 të vdekur, mes tyre 26 pjesëtarë të forcave të sigurisë dhe një civil. Presidentja Claudia Sheinbaum vlerësoi sakrificën e forcave të armatosura dhe siguroi publikun se situata po kthehet në normalitet.

Megjithatë, eliminimi i El Mencho-s hap një kapitull të ri pasigurie, ndërsa autoritetet presin riorganizimin e brendshëm të njërës prej strukturave kriminale më të fuqishme dhe më të dhunshme në historinë e Meksikës. /tesheshi.com/