Lista e gjatë e arsyeve pse shqiptarëve u ka ardhur në majë hundës me ketë qeveri
Conor Gallagher, Naked Capitalism
Protesta masive në Shqipëri po vazhdojnë me intensitet të lartë pas lajmeve të bujshme se Jared Kushner dhe Ivanka Trump planifikojnë të zhvillojnë ishullin e Sazanit, ishullin më të madh të vendit, si dhe pjesë të ekosistemit delikat të ligatinës dhe lagunës së Nartë-Zvërnecit, në një destinacion turistik luksoz që shtrihet në mbi 250 hektarë.
Kjo zonë përfaqëson një pikë shumë strategjike midis Ngushticës së Otrantos dhe Gjirit të Vlorës, duke shënuar kufirin natyror midis deteve Adriatik dhe Jon përpara se të derdhen në Mesdhe.
Kjo marrëveshje tejet e dyshimtë ka rindezur zemërimin e thellë të qytetarve në Shqipëri lidhur me modelin ekonomik të vendit, korrupsionin galopant, shkatërrimin e pakthyeshëm mjedisor dhe statusin e shtetit si një lloj rrecke këmbësh për Bashkimin Europian.
SPAK, Struktura e Posaçme Kundër Korrupsionit dhe Krimit të Organizuar, konfirmoi zyrtarisht se po kryen një hetim të gjerë penal mbi këtë projekt, i cili përveç çiftit Trump-Kushner mbështetet edhe nga dy vëllezër miliarderë nga Katari, një biznesmen i akuzuar hapur për lidhje të ngushta me mafien italiane, një gjyqtar i korruptuar si dhe një nga oligarkët më të fuqishëm dhe me ndikim në Shqipëri.
Pavarësisht këtyre hijeve të rënda, kryeministri Edi Rama mbetet plotësisht i përkushtuar ndaj projektit, duke deklaruar se ky zhvillim përputhet saktësisht me ambicien e Shqipërisë për t’u shndërruar në një destinacion global të turizmit të luksit.
Megjithatë, kritikët dhe vëzhguesit ndërkombëtarë ngrenë alarmin se ndërsa turizmi ka pësuar një rritje eksponenciale, Shqipëria mbetet një qendër globale e trafikimit të qenieve njerëzore ku gratë dhe të miturit shfrytëzohen barbarisht për seks.
Me këtë bum turistik, vendi po transformohet me shpejtësi nga një portë tranziti e trafikimit drejt Europës në një vend destinacioni final për rrjetet e fuqishme të krimit të organizuar që lulëzuan pas shpërbërjes së Jugosllavisë dhe luftërave të përgjakshme në Ballkan.
Jared Kushner dhe Ivanka Trump, raportohet se e “zbuluan” potencialin e Sazanit teksa po lundronin në jahtin luksoz të Nat Rothschild, ku Kushner u nxit të investonte në Shqipëri nga Richard Grenell, ish-drejtori i inteligjencës kombëtare dhe aktualisht i dërguari i posaçëm presidencial për misione speciale në administratën e re Trump.
Takimi fillestar midis Kushnerit dhe kryeministrit Rama u organizua pikërisht nga Rothschild në jahtin e tij, duke i hapur rrugën projektit miliardash për atë që po quhet si një resort-bunker luksoz.
Përfshirja e Nat Rothschild në këtë histori, rikthen në vëmendje dosjet famëkeqe të Jeffrey Epstein, ku emri i dinastisë Rothschild shfaqet vazhdimisht përgjatë historisë së rrjetit të abuzimit Epstein-Maxëell.
Edhe pse është e pamundur të thuhet me siguri se ishulli i Kushnerit do të kthehet në një zëvendësues të ishullit të Epsteinit, koincidenca e personazheve, lokacioni gjeografik i izoluar dhe të kaluarat e tyre nxisin spekulime të forta.
Për më tepër, Sazani strehon të paktën 3600 bunkerë bërthamorë të epokës sovjetike dhe mbi 16 km tunele nëntokësore, gjë që përshtatet çuditërisht mirë me trendin e ri të miliarderëve globalë për të ndërtuar vendstrehime nëntokësore luksoze në rastin e një kolapsi global.
Përveç kësaj, Kushner ka qenë historikisht shumë i hapur për qëllimin e tij për të zgjeruar sferën e ndikimit të Izraelit, dhe ky projekt në Adriatik duket se i shërben kësaj linje.
Shqipëria i ka thelluar në mënyrë dramatike marrëdhëniet e saj me Izraelin, veçanërisht gjatë kohës së konfliktit në Gaza, duke nënshkruar marrëveshje të shumta në sektorë si bujqësia, energjia, turizmi dhe mbrojtja ushtarake.
Eksportet izraelite drejt Shqipërisë janë rritur me mbi 150 për qind vitet e fundit, ndërsa investimet izraelite po prekin fort sektorin financiar me krijimin e JET Bank, banka e parë plotësisht digjitale në vend, në pronësi të biznesmenit britaniko-izraelit Idan Avishai.
Ky bashkëpunim ka shkuar deri aty, sa raportet e të drejtave të njeriut e rreshtojnë Shqipërinë si një nga vendet që vazhdon të furnizojë Izraelin me karburant për operacionet ushtarake.
Bashkëpunimi ushtarak u kurorëzua me një marrëveshje miliona eurosh me kompaninë gjigante të mbrojtjes Elbit Systems për blerjen e sistemeve të artilerisë dhe dronëve taktikë, ndërsa kjo kompani regjistroi degën zyrtare në Shqipëri dhe ra dakord të rihapë akademinë e aviacionit shqiptar për trajnimin e pilotëve.
Kjo lidhje e ngushtë politike, u vulos me krijimin e Grupit Aleat të Izraelit në parlamentin shqiptar me mbështetjen e të dyja palëve kryesore politike dhe me vizitën zyrtare të Ramës në Jeruzalem për t’u takuar me Benjamin Netanyahun.
Një tjetër element kyç në prapaskenën e resortit të Sazanit janë vëllezërit Khayyat, miliarderë me shtetësi katariane dhe origjinë siriane, të cilët zotërojnë kompaninë Poëer International Holding.
Kjo kompani kishte plot 12 miliardë dollarë në kontrata të ngrira në Siri për shkak të sanksioneve të ashpra amerikane të njohura si Akti Cezar. Pasi lobuan dhe hynë në ortakëri me kompaninë e Kushnerit, Affinity Partners, ky i fundit bindi vjehrrin e tij, presidentin Donald Trump, të nënshkruante ligjin që solli rrëzimin e sanksioneve dhe heqjen e barrierave financiare.
Ky veprim zhbllokoi pasurinë e tyre legjendare, e cila tani po përdoret pjesërisht për të financuar projektin e Sazanit, ndërkohë që qeveria shqiptare shtroi tapetin e kuq për këtë fluks parash.
Përballë këtij dorëzimi total të sovranitetit, pasurive publike dhe dinjitetit kombëtar përpara oligarkëve, mafies dhe interesave të huaja gjeopolitike, populli shqiptar duket se ka arritur në pikën ku nuk mund të mbajë më dhe po reagon ashpër në rrugë. \tesheshi.com\
