Forcimi i sigurisë kufitare midis dy vendeve dikur në luftë
Iraku dhe Irani nënshkruan një marrëveshje për të forcuar sigurinë kufitare, një veprim që zyrtarët irakianë thanë se synonte kryesisht forcimin e kufirit me rajonin kurd të Irakut, ku Teherani thotë se disidentët e armatosur kurdë përbëjnë një kërcënim për sigurinë e tij.
Marrëveshja e përbashkët e sigurisë përfshin koordinimin në “mbrojtjen e kufijve të përbashkët midis dy vendeve dhe konsolidimin e bashkëpunimit në disa fusha të sigurisë”, thuhet në një deklaratë nga zyra e kryeministrit irakian, raporton Reuters.
Sekretari i Këshillit të Lartë të Sigurisë Kombëtare të Iranit, Ali Shamkhani nënshkroi kontratën me Këshilltarin e Sigurisë Kombëtare të Irakut, Qasim al-Araji, në prani të kryeministrit irakian Mohammed al-Sudani, tha Zyra e Kryeministrit.
“Sipas marrëveshjes së nënshkruar të sigurisë, Iraku merr përsipër të mos lejojë grupet e armatosura të përdorin territorin e tij në rajonin kurd të Irakut për të kryer ndonjë sulm ndërkufitar ndaj Iranit fqinj”, tha një zyrtar irakian i sigurisë që mori pjesë në nënshkrim.
Ministri i Jashtëm iranian Hossein Amirabdollahian, duke folur në Teheran, tha se “udhëtimi aktual i Shamkhani në Irak ishte planifikuar katër muaj më parë dhe është i fokusuar në çështjet që lidhen me grupet e armatosura në Irakun verior”. Republika Islamike e Iranit në asnjë mënyrë nuk do të pranojë kërcënime nga territoret irakiane, shtoi ai. /tesheshi.com/
