Një dëshmi shtesë për rritjen e fuqisë së Turqisë në arenën ndërkombëtare pasqyrohet në Indeksin e Fuqisë Ushtarake për vitin 2025 të publikuar nga Global Firepower. Në dritën e ndryshimeve gjeopolitike që kanë ndodhur gjatë dy viteve të fundit, vlerësimi i ri e ka ngritur Turqinë në vendin e parë për sa i përket fuqisë ushtarake në Lindjen e Mesme.
Analiza e të dhënave zbulon një hartë të re të ekuilibrave të forcës në rajon, ku pesë vendet e para i zënë: Turqia, Izraeli, Irani, Egjipti dhe Arabia Saudite.
Nga 145 shtete që u përfshinë në vlerësimin global, Turqia arriti të hyjë në listën e dhjetëshes së parë, duke zënë vendin e nëntë botëror, dhe duke ruajtur kështu stabilitetin e saj në klasifikim. Ndërsa Izraeli vlerësohet në vendin e dytë në nivel rajonal dhe të 15-in globalisht, dhe të dhënat tregojnë një drejtim ngjitës të fuqisë së tij.
Irani renditet i treti rajonal dhe i 16-i në botë, me vetëm një vend më poshtë se Izraeli, por të dhënat sinjalizojnë një rënie të madhe të fuqisë së tij si rezultat i “luftës së 12 ditëve”.
Pesëshja rajonale plotësohet nga Egjipti, i cili mban vendin e 19-të global me një tendencë rënëse, dhe Arabia Saudite në vendin e 24-t globalisht, edhe ajo me prirje rënëse.
Ndër shtetet e tjera të spikatura në rajon: Iraku në vendin e 43-të, Emiratet e Bashkuara Arabe në vendin e 54-t, dhe Siria në vendin e 64-t.
Në nivel global, Shtetet e Bashkuara ruajnë kryesimin në vendin e parë, të ndjekura nga Rusia në të dytin dhe Kina në të tretin, ndërsa India dhe Koreja e Jugut plotësojnë pesëshen e parë në vendet e katërt dhe të pestë.
Mbretëria e Bashkuar (6), Franca (7) dhe Japonia (8) i paraprijnë Turqisë (9), ndërsa Italia vjen në vendin e dhjetë. Gjermania vlerësohet në vendin e 14-të, një vend përpara Izraelit, dhe Ukraina në vendin e 20-të.
Klasifikimi përfundimtar i Global Firepower merr parasysh më shumë se 60 faktorë për të përcaktuar “shkallën e fuqisë” për çdo shtet. Këto përfshijnë kategori të tilla si: madhësia e njësive ushtarake, gjendja financiare, kapacitetet logjistike dhe të dhënat gjeografike.
