Qëndrimi i Perëndimit ndaj shtetit sionist mban erë standardesh të dyfishta
Ahmed Najar, TRT World
Britania, Franca, Kanada dhe Norvegjia njoftuan sanksione ndaj rrjeteve që financojnë dhunën e kolonëve në Bregun Perëndimor të pushtuar. Franca madje i ndaloi hyrjen Ministrit të Financave, Bezalel Smotrich.
Kjo u paraqit si provë se qeveritë perëndimore po vendosin më në fund një vijë të kuqe. Por lind pyetja: përgjegjësi për çfarë ekzaktësisht? Nëse dhuna dhe vjedhja e tokës kërkojnë sanksione, pse e trajtojnë problemin sikur ai kufizohet te pak ekstremistë dhe jo te shteti që i mundëson ato?
E meta e këtyre masave është se i ndajnë kolonët nga sistemi që i krijoi. Imazhi se disa kolonë radikalë veprojnë jashtë ligjit ndërsa qeveria përpiqet t’i kontrollojë, është i rremë. Dhuna e tyre ndodh për shkak të politikës izraelite.
Vetë kolonitë janë të paligjshme sipas ligjit ndërkombëtar, e megjithatë ato zgjerohen, infrastrukturat financohen dhe palestinezët dëbohen nën mbrojtjen ushtarake.
Dhunë e sponsorizuar nga shteti
Një raport i OKB-së konfirmoi se autoritetet izraelite e lehtësojnë dhunën e kolonëve me mbështetje financiare, ushtarake e ligjore. Prandaj, kjo nuk është thjesht çështje kriminale, por politikë shtetërore.
Sanksionimi i pak individëve, duke e lënë shtetin të paprekur, është vetëm teatër politik. Ky fokus te disa aktorë të këqij krijon përshtypjen e rreme se Izraeli nuk është problemi. Por kolonët sulmojnë sepse gëzojnë mbrojtjen e ushtrisë dhe institucioneve.
Kontradikta thellohet kur sheh se ditë pas sanksioneve, Britania lejoi një ekspozitë izraelite në Londër që promovon shitjen e shtëpive të paligjshme në Bregun Perëndimor. Nëse kolonitë janë të paligjshme, pse lejohet tregtimi i tyre?
Kjo bëhet edhe më shqetësuese përballë Gazës, ku Izraeli akuzohet për gjenocid, por Perëndimi vazhdon bashkëpunimin ushtarak dhe mbrojtjen diplomatike.
Standardet e dyfishta të Perëndimit
Kur Rusia pushtoi Ukrainën, sanksionet ekonomike erdhën brenda pak ditësh bazuar në parimin se shkelësi i ligjit ndërkombëtar duhet të përballet me pasoja. Përkundrazi, me Izraelin debatohet vetëm për ndalime udhëtimi të disa individëve.
Nëse aneksimi është i gabuar në Ukrainë, pse është i negociueshëm në Lindjen e Mesme? Sanksionet ndaj individëve mund të bëjnë bujë, por nuk e ndalin pushtimin. Dhuna është rezultati i parashikueshëm i një sistemi të kultivuar për dekada.
E vërteta e pakëndshme është se qeveritë perëndimore po sanksionojnë simptomat për të mbrojtur sëmundjen. Masat e llogaridhënies po kthehen në një mekanizëm që e ndihmon Izraelin t’i shmanget asaj. \tesheshi.com\
