Gjykata amerikane për një afgan: 14 vjet “kot” në Guantanamo

Një gjykatës amerikan ka vendosur se SHBA nuk ka bazë ligjore për të mbajtur një afgan në kampin e burgut të Gjirit të Guantanamos në Kubë, duke i hapur rrugën lirimit të tij, tha avokati për Al Jazeera.

Asadullah Haroon Gul ka qenë në Guantanamo që nga qershori 2007, pasi u arrestua nga forcat afgane në qytetin lindor të Jalalabad dhe iu dorëzua ushtrisë amerikane.

Bazuar në kërkesën për arrest të paligjshëm, gjyqtari Amit Mehta hodhi poshtë argumentet e qeverisë amerikane për të vazhduar mbajtjen e Gul në burg.

“Kërkesa u pranua,” tha Tara Plochocki, avokate e Gul, duke shtuar se ajo ishte “e kënaqur” me vendimin e gjyqtarit.

Gul ka qenë në Guantanamo pa akuza për 14 vjet dhe atij iu mohua aksesi për një avokat për nëntë vitet e para. Avokatët ngritën një padi në gjykatën federale në Uashington në vitin 2016, duke argumentuar se arrestimi i tij ishte i paligjshëm.

Detajet e vendimit të gjyqtarit janë mbajtur sekret tani për tani, por avokatët e Gul thonë se rezultati është i qartë.

“Gjyqtari vendosi se qëndrimi i tij në burg ishte i paligjshëm. Ashtu si me çdo urdhër tjetër gjykate kundër qeverisë amerikane, ekziston një detyrim kushtetues që ai të hyjë në fuqi. Kjo do të thotë se ai duhet të lirohet menjëherë”, tha Plochocki.

Premtimi i Bidenit

Edhe pse Gjykata e Lartë e SHBA vendosi në vitin 2008 se të burgosurit e Guantanamos kanë të drejtë të ankohen se janë arrestuar në mënyrë të paligjshme, vendimi i gjykatësit Mehta është rasti i parë në 10 vjet, tha Plochoki.

Gul ishte një anëtar i grupit Hazb-e-Islami, ose Partia Islamike e Afganistanit, e cila arriti një marrëveshje paqeje me qeverinë afgane në Kabul në vitin 2016.

Avokatët e tij pretendojnë se ai duhet të shpallet i pafajshëm sepse “armiqësitë amerikane në Afganistan janë ndalur”, por gjykatësi i hodhi poshtë këto argumente.

Gul nuk ka qenë kurrë një anëtar i talebanëve, al-Kaedës apo ndonjë grupi të lidhur me al-Kaedën, as nuk ka luftuar kundër Shteteve të Bashkuara. Ai paraqiti dokumente në gjykatë se ishte në një udhëtim pune në Afganistan nga një kamp refugjatësh në Pakistan, ku jetonte me familjen e tij, kur u arrestua.

Gul është një nga 39 personat e burgosur në Guantanamo dhe tani është një nga 13 që janë liruar nga komiteti i kontrollit ushtarak.

Presidenti Joe Bide ka premtuar mbylljen e Guantanamos, ku më shumë se 740 njerëz u arrestuan midis 2002 dhe 2017, shpesh pa akuza, dhe shumë prej tyre pësuan tortura të rënda. /tesheshi.com/