Franca ka bërë thirrje për dorëheqjen e raportueses së OKB-së për territoret palestineze të pushtuara, Francesca Albanese. Ministri i Jashtëm francez, Jean-Noël Barrot, në një përgjigje para Parlamentit francez të mërkurën, i cilësoi deklaratat e Albaneses gjatë Forumit të Al Jazeera-s për Gazën si “të turpshme dhe të papranueshme”.
Nga ana e saj, Albanese mohoi se kishte akuzuar Izraelin si popull apo si shtet, dhe theksoi se fjalimi i saj ishte përqendruar në atë që ajo e quajti “krime” dhe politika që duhet të mbahen përgjegjëse.
Albanese kishte deklaruar – në një ndërhyrje përmes videos në Forumin e Al Jazeera-s – se ekziston “një armik i përbashkët që ka lejuar ndodhjen e një gjenocidi në Gaza”.
Ajo tha:
“Në vend që ta ndalonin Izraelin, shumica e vendeve të botës e kanë armatosur, i kanë dhënë justifikime dhe mbrojtje politike, si dhe i kanë ofruar mbështetje ekonomike dhe financiare.”
Ajo shtoi:
“Ne, që nuk kontrollojmë kapitale të mëdha, as algoritme, as armë, tani e kuptojmë se si njerëzim kemi një armik të përbashkët.”
Raportuesja e OKB-së, në një intervistë për kanalin “France 24” të mërkurën, para deklaratës së Barrot-it, dënoi atë që e quajti “akuza plotësisht të rreme dhe shtrembërim” të fjalëve të saj.
Albanese tha:
“Nuk kam thënë kurrë, kurrë, kurrë se Izraeli është armiku i përbashkët i njerëzimit.”
Ajo sqaroi:
“Unë fola për krimet e Izraelit, për aparteidin dhe për gjenocidin, dhe dënoja sistemin që nuk lejon që Izraeli të vihet para drejtësisë dhe të ndalen krimet e tij, duke e konsideruar atë sistem si armik të përbashkët.”
