Premtimi: Turqia s’do të lejojë një konflikt të ri
Ministri i Jashtëm turk Mevlut Çavushoglu tha në Sarajevë, në kuadër të një turi rajonal, se Ballkani nuk mund të përballojë kthimin në ditët e errëta të viteve 1990 dhe se njerëzit në këtë zonë meritojnë shumë më mirë dhe se është e nevojshme të diskutohet zhvillimi, prosperiteti dhe gjithëpërfshirja.
“Njerëzit këtu në Sarajevë e dinë se sa e çmuar është paqja. Gjithashtu, ne e dimë se çmimi i luftës është gjithmonë më i lartë se çmimi i paqes. Kjo është arsyeja pse ne po investojmë në paqe me politikën tonë të jashtme iniciative dhe humanitare. Veprimet tona synojnë gjithmonë të hapin hapësirë për diplomaci dhe dialog. Përpjekjet tona për të ndaluar gjakderdhjen në Ukrainë janë një shembull,” tha Çavushoglu.
“Disa vende e konsiderojnë Ballkanin një zonë ndikimi. Për ne, është pjesë e jona dhe ne jemi pjesë e saj. Kështu e shohim ne këtë rajon. Bosnja ka një vend të veçantë në zemrat tona. Bosnja ka vuajtur shumë dhe nuk mund të lejojmë një tjetër konflikt. Presidenti Erdogan është i përfshirë personalisht në përpjekjet për të ruajtur paqen dhe stabilitetin në rajon. Jemi në kontakt të rregullt me të gjitha palët. Turi im rajonal është pjesë e këtyre përpjekjeve”, tha Çavushoglu, i cili tashmë pritet të jetë dhe në Kosovë.
Çavushoglu theksoi se Turqia dërgon një mesazh të qartë se dialogu është mënyra e vetme për të kapërcyer dallimet. /tesheshi.com/
