Putin te Xi Jinping: Marrëdhëniet Rusi-Kinë në “nivel të paparë’
Xi Jinping dhe Vladimir Putin vlerësuan lidhjet e ngushta midis vendeve të tyre, pavarësisht kontekstit të tensionuar global, me presidentin rus që foli për marrëdhënie “të nivelit të paparë“, në deklarata në prani të homologut të tij kinez.
Nga ana e tij, Xi përshëndeti “partneritetin strategjik gjithëpërfshirës” midis dy vendeve dhe përsëriti dëshirën e tij që Kina dhe Rusia të punojnë së bashku “për të ndërtuar një sistem qeverisjeje globale më të drejtë dhe të arsyeshëm”, sipas deklaratave që bëri para bisedimeve të tij me Putinin.
Presidenti rus ka qenë në Kinë që nga e diela. Ai mori pjesë në samitin e Organizatës së Bashkëpunimit të Shangait (SCO) në Tianjin dhe do të marrë pjesë në një paradë të madhe ushtarake në Pekin të mërkurën për të shënuar 80-vjetorin e fitores së Kinës ndaj Japonisë në Luftën e Dytë Botërore.
Xi vizitoi Moskën në maj për të shënuar festimet ruse të përfundimit të Luftës së Dytë Botërore.
Si Kina ashtu edhe Rusia janë në kundërshtim me Perëndimin dhe Shtetet e Bashkuara. Nga Tianjin, Putin, pavarësisht takimit të tij të fundit me Presidentin e SHBA-së Donald Trump në Alaska, nuk dukej i gatshëm të dorëzohej para presionit të republikanit dhe të pranonte një marrëveshje paqeje që do t’i jepte fund luftës në Ukrainë.
Për më tepër, Kina dhe SHBA-të u angazhuan në një luftë tarifore në fillim të vitit, përpara se të binin dakord për një armëpushim.
Marrëdhëniet evropiane me rusët dhe kinezët janë gjithashtu të tensionuara.
Me samitin e Tianjin dhe paradën e 3 shtatorit, Pekini synon të vendoset si një kampion i një qeverisjeje të re globale kundër hegjemonisë perëndimore, një faktor paqëndrueshmërie dhe padrejtësie, siç e sheh ai. Dje, të hënën, Xi denoncoi “veprimet kërcënuese” dhe “mentalitetin e Luftës së Ftohtë dhe mentalitetin e përballjes së koalicioneve”.
“Komunikimi ynë i ngushtë pasqyron natyrën strategjike të marrëdhënieve ruso-kineze, të cilat aktualisht janë në një nivel të paparë”, komentoi Putin sot.
Prania e presidentit rus në paradën e së mërkurës është për të një mënyrë “për t’u bërë nderime arritjeve të popujve tanë, popullit rus dhe atij kinez, dhe është një konfirmim i rolit vendimtar të vendeve tona në fitoren në boshtin evropian dhe aziatik”, siç shpjegoi ai.
“Ne ishim gjithmonë bashkë atëherë dhe mbetemi bashkë edhe tani”, theksoi Putin.
“Marrëdhëniet midis Kinës dhe Rusisë i kanë rezistuar provës së ndryshimeve ndërkombëtare dhe janë marrëdhënie fqinjësie të mirë, bashkëpunimi strategjik gjithëpërfshirës dhe bashkëpunimi reciprokisht i dobishëm që synojnë rezultate të përbashkëta pozitive midis fuqive të mëdha”, tha Xi.
Aleatët e Ukrainës besojnë se Kina po e mbështet Rusinë në luftë, me Pekinin që përgjigjet se mbetet neutral dhe akuzon Perëndimin për zgjatjen e konfliktit duke i siguruar armë Kievit. /tesheshi.com/
