Rreth 100 000 persona janë grumbulluar në kryeqytetin e Venezuelës, Karakas, në mbështetje të kandidatit opozitar për president Henrique Capriles, i cili e ka akuzuar presidentin aktual Hugo Chavez për një sërë premtimesh të pambajtura.
Gjithashtu Capriles kërkoi drejtësi për tre aktivistë opozitarë të cilët u vranë në Barinas ditën e shtunë.
“Ditën e shtunë si pasojë e dhunës vdiqën tre njerëz, gjë që nuk duhet të ndodhë kurrë. Unë dua tu them familjeve të tyre se ne do e mposhtim dhunën më 7 Tetor”, u shpreh Capriles duke iu referuar ditës së zgjedhjeve elektorale.
Geison Valero, i Partisë së Drejtësisë dhe Omar Fernandez, një deputet i pavarur, mbetën të vrarë kur një person i armatosur hapi zjarr me breshëri ndaj tyre.
Politikanët ndodheshin në krahinën e Barinasit, ku do të mbanin një tubim në mbështetje të kundërshtarit të Presidentit Chavez, Henrique Capriles.
Barinas, vendi ku ka lindur dhe është rritur Hugo Chavez, dallohet për mbështetjen e fortë që i jep presidentit autoritar.
Chavez, njeriu që drejton Venezuelë që prej vitit 1999, konfirmoi pjesëmarrjen e tij në zgjedhje për një mandat të ri, ndonëse një vit më parë u diagnostikua me kancer./tch/kohaislame
