Gazeta amerikane “Wall Street Journal”, duke cituar zyrtarë aktualë dhe ish-zyrtarë amerikanë, ka zbuluar se sulmi i kryer nga një dron iranian më 3 mars ndaj ambasadës amerikane në Riad shkaktoi dëme shumë më të mëdha sesa u deklarua publikisht nga qeveritë amerikane dhe saudite.
Gazeta raportoi se disa kate të ndërtesës pësuan dëme të rënda dhe se pjesë të saj ende janë “të pariparueshme”, ndërsa një zjarr i shkaktuar nga sulmi vazhdoi për 12 orë.
Sipas raportit, dy dronë iranianë arritën të shmangin sistemet mbrojtëse “Patriot” që mbrojnë zonën diplomatike në Riad. I pari goditi ndërtesën e ambasadës, ndërsa një predhë e dytë hyri një minutë më vonë përmes të njëjtës hapje për të rritur shkatërrimin e brendshëm, duke synuar – ndër të tjera një stacion lokal të CIA-s në katin e sipërm.
Qeveritë nuk zbuluan fillimisht dëmtimin e kësaj njësie të inteligjencës, edhe pse një njoftim i brendshëm i Departamentit të Shtetit e përshkroi sulmin si një që “shkaktoi shembjen” e një pjese të tavanit të ambasadës.
Analistët ushtarakë i thanë gazetës se koha e sulmit, në orën 01:30 të mëngjesit, kur ambasada ishte pothuajse bosh, parandaloi viktima.
/Burimi: Arabi Post/
