Shamse al-Ali (65-vjeçe), e cila humbi djalin e saj të vetëm në sulmin e forcave të koalicionit të udhëhequr nga SHBA-ja në Siri, për t’u kujdesur për 6 nipërit e saj jetimë me duart e saj bën furra prej balte
Shamse al-Ali (65-vjeçe), e cila humbi djalin e saj të vetëm në sulmin e forcave të koalicionit të udhëhequr nga SHBA-ja në provincën e Deir ez-Zor 8 vjet më parë në luftën civile në Siri, për t’u kujdesur për 6 nipërit e saj jetimë me duart e saj bën furra prej balte “tandoori”.
Në vitin 2015, Shamse humbi djalin e saj në një sulm ajror të kryer nga forcat e udhëhequra nga SHBA-ja në zonën ku ata jetojnë në Deir ez-Zor. Gruaja e moshuar emigroi në Raqqa nga Deir ez-Zor i cili në atë kohë ishte në qendër të sulmeve të organizatës terroriste PKK/YPG dhe forcave të koalicionit, për t’u ofruar një jetë më të sigurt 6 nipërve të saj jetimë.
Pasi jetoi në Raqqa për rreth 4 vjet, familja nga Deir ez-Zori u vendos në rrethin Tel Abyad, i cili u bë i sigurt me operacionin “Burimi i Paqes” të udhëhequr nga Türkiye.
Shamse jeton me 6 nipërit e saj të moshës 8 deri në 13 vjeç në fshatin Hawija, 7 kilometra në jug të Tal Abyad. E moshuara, e cila merr përsipër barrën e familjes, prodhon furra “tandoori” në kopshtin e shtëpisë ku qëndron duke përdorur metodën që ka mësuar nga nëna e saj.
– “Më janë plakur duart, procesi i brumit është shumë i lodhshëm”
Në një prononcim për Anadolu, Shamse tha se bërja e “tandoorit” është një punë e mundimshme dhe e lodhshme.
“Tandoorin e bëjmë në tre faza. Fillimisht bëjmë shtresën e poshtme dhe e thajmë. Pasi të përfundojë pjesa e poshtme, bëjmë shtresën e mesme dhe e thajmë. Pasi të thahet pak, rrafshojmë sipërfaqet e brendshme dhe të jashtme me ndihmën e dërrasave”, tha ajo.
Duke shpjeguar se një “tandoor” përgatitet në tre ditë në varësi të kushteve të motit, Shamse tha: “Është një proces shumë i vështirë dhe kërkon forcë. Unë mund të bëj vetëm 5-6 tandoori në muaj”.
Sipas saj, mosha nuk është e përshtatshme për të bërë tandoori. “Më janë plakur duart, procesi i përzierjes është shumë i lodhshëm. Çmimi i një tandoori është 90 mijë SL (rreth 10 euro)”, u shpreh Shamse.
– “Nipat e mi nuk kanë askënd përveç meje”
Shamse tha ajo mbledh kartonë nga dyqanet gjatë gjithë vitit për të ngrohur nipërit e saj në dimër.
“Nipërit e mi nuk kanë tjetër veç meje. Sot për mëngjes kishte vetëm za’atar, vaj dhe kos. Në drekë ka bullgur. Të mbijetosh në dimër është si vdekje”, tha ajo.
E moshuara nga Deir ez-Zor tha se nuk është e lehtë të mbijetojë me 6 nipërit e saj dhe shprehu shqetësimin për të ardhmen e nipërve të saj.
