Qeveria publikoi udhërrëfyesin 3-vjeçar për ekonominë turke
Ekonomia e Turqisë parashikohet të rritet me 9 për qind këtë vit dhe me 5 për qind shtesë në vitin 2022, sipas programit ekonomik afatmesëm të vendit të publikuar në Gazetën Zyrtare, transmeton Anadolu Agency (AA).
Qeveria synon një rritje prej 5,5 për qind në vitet 2023 dhe 2024, sipas programit trevjeçar, ndërsa objektivi mesatar i rritjes së Produktit të Brendshëm Bruto (PBB) është 5,3 për qind.
PBB-ja e Turqisë u rrit 21,7 për qind në bazë vjetore në tremujorin e dytë të vitit 2021, niveli më i lartë vjetor i rritjes që nga viti 1999, sipas të dhënave zyrtare të publikuara javën e kaluar.
Duke komentuar programin, ministri i Thesarit dhe Financave, Lutfi Elvan, shkroi në Twitter: “Ne do të forcojmë më tej stabilitetin makroekonomik për një rritje të qëndrueshme të udhëhequr nga sektori privat”.
Inflacioni vjetor i Turqisë, i cili u rrit në 19,25 për qind në gusht nga 18,95 për qind në korrik, parashikohet të arrijë në 16,2 për qind deri në fund të këtij viti.
Ai pritet të bjerë në 9,8 për qind deri në fund të vitit 2022, sipas programit të ri ekonomik, ndërsa objektivat e fundvitit për 2023 dhe 2024 janë 8 për qind, përkatësisht 7,6 për qind.
Raporti i deficitit të llogarisë rrjedhëse ndaj PBB-së parashikohet të jetë 2,2 për qind vitin e ardhshëm, duke u ulur më tej në 1,5 për qind në vitin 2023 dhe 1 për qind në vitin 2024.
PBB-ja për frymë pritet të tejkalojë 11.000 dollarë deri në vitin 2024, sipas programit. Shifra do të jetë 9.947 dollarë në vitin 2022, 10.703 dollarë në vitin 2023 dhe 11.465 dollarë në vitin 2024.
Qeveria synon që PBB-ja të tejkalojë 850 miliardë dollarë në vitin 2022, para se të arrijë 975 miliardë dollarë në vitin 2023 dhe të kalojë 1 trilion dollarë në vitin 2024.
PBB-ja e Turqisë me çmimet aktuale parashikohet të jetë rreth 801 miliardë dollarë këtë vit, ndërsa ishte 717 miliardë dollarë në vitin 2020, sipas Institutit të Statistikave të Turqisë.
Kursi i këmbimit të dollarit amerikan dhe lirës turke do të jetë rreth 8,30 deri në fund të këtij viti dhe do të rritet në 9,27 në vitin 2022, 9,77 në vitin 2023 dhe 10,26 në vitin 2024, sipas programit.
Objektivi i eksporteve të vendit është 230,9 miliardë dollarë për vitin 2022 dhe të rritet në 255 miliardë dollarë deri në vitin 2024.
Deficiti buxhetor i Turqisë, i cili është rritur për shkak të ndikimit të pandemisë së koronavirusit, parashikohet të rritet në vitet e ardhshme.
Ai pritet të jetë 230 miliardë lira turke (27,7 miliardë dollarë) këtë vit, me një objektiv prej 278,4 miliardë lirash (30 miliardë dollarë) për vitin 2022, 290,2 miliardë (29,7 miliardë dollarë) në vitin 2023 dhe 294 miliardë lira (28,7 miliardë dollarë) në vitin 2024.
Shkalla e papunësisë në Turqi, e cila ishte 10,6 për qind në qershor, do të arrijë në 12,6 për qind deri në fund të këtij viti, sipas vlerësimeve të programit.
Qeveria synon ta ulë atë në 12 për qind vitin e ardhshëm, 11,4 për qind në vitin 2023 dhe 10,9 për qind në vitin 2024.
