Zyra e Medias së Qeverisë në Gaza ka akuzuar Izraelin se po shkakton me qëllim uri dhe kaos në Rripin e Gazës.
Sipas deklaratës, shumica e 87 kamionëve me ndihma që hynë dje në Gaza janë grabitur, në atë që zyra e cilëson si “kaos sistematik i nxitur nga okupimi izraelit”.
Një operacion ndihmash nga ajri solli sasi të barabarta me vetëm gjysmën e një kamioni dhe ra në zona të kontrolluara nga ushtria izraelite, si Tuffah dhe Jabalia, të cilat janë të paarritshme për civilët.
Po ashtu, zyra akuzon Izraelin për një “masakër të qëllimshme”, pasi fillimisht bllokoi hyrjen e ndihmave dhe më pas sulmoi ekipet e sigurisë që shoqëronin ndihmat, duke vrarë 11 roje.
“Çfarë po ndodh në Gaza është një model i qartë dhe i qëllimshëm i mënyrës se si okupimi izraelit po nxit me vetëdije kaos dhe uri,” thuhet në deklaratë, duke shtuar se ndihmat po pengohen qëllimisht të arrijnë te magazinat apo përfituesit e synuar. /mesazhi
