Si po e bllokon Netanyahu kompromisin dhe nxit përshkallëzimin ushtarak
Presidenti amerikan Donald Trump ka hedhur poshtë në mënyrë të prerë kundërpropozimin e Iranit për t’i dhënë fund konfliktit dhjetëjavor, duke e cilësuar atë si “të papranueshëm” dhe duke lënë botën në një ankth të ri diplomatik.
Ky vendim i menjëhershëm ka shkaktuar kaos në tregjet globale, ku çmimi i naftës u rrit me mbi 4 dollarë për fuçi brenda pak orësh, ndërkohë që Ngushtica e Hormuzit mbetet e paralizuar dhe e rrethuar nga tensionet ushtarake.
Irani dorëzoi të dielën një përgjigje që fokusohej në ndalimin e luftës në të gjitha frontet, me theks të veçantë në Liban, ku Izraeli po lufton kundër militantëve të Hezbollahut të mbështetur nga Teherani.
Kërkesat e Iranit përfshinin përfundimin e bllokadës detare të SHBA-së, dëmshpërblim për dëmet e luftës, sovranitet të plotë mbi Ngushticën e Hormuzit dhe heqjen e sanksioneve që bllokojnë shitjen e naftës.
Megjithatë, reagimi i Trump ishte i rrufeshëm dhe i ashpër, duke deklaruar në rrjetet sociale se plani nuk i pëlqente dhe ishte tërësisht i papranueshëm, pa ofruar asnjë detaj tjetër apo rrugëdalje diplomatike.
Ndërkohë që administrata amerikane kërkonte një armëpushim përpara diskutimeve për çështje më të nxehta si programi bërthamor, po konfirmohet roli kryeministrit izraelit Benjamin Netanyahu si pengesa kryesore dhe “shkatërruesi” i çdo mundësie për kompromis.
Netanyahu ka deklaruar hapur se lufta nuk ka mbaruar dhe se diplomacia mund të mos jetë e mjaftueshme për të çmontuar kërcënimin iranian, duke këmbëngulur në eliminimin e uraniumit të pasuruar dhe shkatërrimin e bazave bërthamore, qoftë edhe përmes forcës.
Ky qëndrim destruktiv i Netanyahut jo vetëm që minon përpjekjet e SHBA-së për stabilitet, por e mban rajonin në një cikël dhune ku asnjëra palë nuk pranon të tërhiqet.
Bllokimi i Ngushticës së Hormuzit, e cila para luftës zinte një të pestën e fluksit global të energjisë, ka krijuar një krizë që po godet rëndë xhepat e konsumatorëve amerikanë dhe po rrit presionin politik mbi Trumpin pak muaj para zgjedhjeve të kongresit.
Edhe pse aleatët e NATO-s kanë refuzuar të përfshihen ushtarakisht pa një marrëveshje të plotë paqeje, hapat e radhës mbeten të paqartë. Tani sytë e botës janë kthyer nga Pekini, ku Trump pritet të takohet me presidentin kinez Xi Jinping për të kërkuar ndërhyrjen e tij te Teherani.
Por teksa Netanyahu vazhdon t’u fryjë flakëve të konfliktit dhe presidentin iranian Pezeshkian zotohet se nuk do të përulet kurrë para armikut, rruga drejt paqes duket më e largët se kurrë. \tesheshi.com\
