E3 kërcënon Iranin me sanksione nëse nuk ka përparim
Irani, Britania, Franca dhe Gjermania (E3) do të zhvillojnë bisedime bërthamore në Stamboll të premten, më 25 korrik, tha një zëdhënës i Ministrisë së Jashtme iraniane.
Marrëveshja për mbajtjen e takimit u arrit pasi tre vendet evropiane paralajmëruan se dështimi për të vazhduar bisedimet do të çonte në rivendosjen e sanksioneve ndërkombëtare ndaj Iranit, raporton Times of Israel.
“Takimi midis Iranit, Britanisë, Francës dhe Gjermanisë do të mbahet në nivelin e zëvendësministrave të jashtëm,” tha zëdhënësi i Ministrisë së Jashtme iraniane Esmail Bagai.
Ministrat e jashtëm të Britanisë së Madhe, Francës dhe Gjermanisë zhvilluan të enjten bisedën e tyre të parë telefonike me ministrin e Jashtëm iranian Abbas Araqchi pas sulmit izraelito-amerikan të muajit të kaluar ndaj objekteve bërthamore iraniane.
Nëse negociatat bërthamore nuk vazhdojnë ose nuk japin rezultate konkrete, E3 ka njoftuar se do t’i kthejë sanksionet e Kombeve të Bashkuara (OKB) Iranit deri në fund të gushtit nëpërmjet të ashtuquajturit “mekanizëm kthimi”.
“Nëse BE/E3 duan të luajnë një rol, ata duhet të veprojnë me përgjegjësi dhe të lënë mënjanë politikat e shteruara të kërcënimeve dhe presionit, përfshirë mekanizmin e kthimit për të cilin ata nuk kanë absolutisht asnjë bazë morale dhe ligjore,” tha Araqchi më parë.
Mekanizmi i kthimit mund të përdoret për të rivendosur sanksionet e OKB-së përpara se rezoluta e Këshillit të Sigurimit të OKB-së që miratoi marrëveshjen të skadojë më 18 tetor të këtij viti. /tesheshi.com/
