Presidenti sirian Ahmed Shar’a, gjatë pjesëmarrjes në një sesion të tryezës së rrumbullakët në kuadër të Samitit “Concordia” të mbajtur në Nju Jork, në margjinat e punimeve të Asamblesë së Përgjithshme të OKB-së, theksoi se rrëzimi i regjimit të mëparshëm hapi një fazë historike të re për rajonin. Ai nënvizoi se çështja e popullit sirian ka qenë një “çështje e drejtë dhe fisnike” përballë një regjimi kriminel që kreu krime lufte dhe masakra masive.
Shar’a sqaroi se beteja për çlirimin e Sirisë u zhvillua me humbje minimale falë përvojave që opozita kishte grumbulluar gjatë qëndrimit të saj në Idlib, duke theksuar se prioriteti sot është arritja e sigurisë dhe stabilitetit përmes bashkimit të popullit sirian dhe forcimit të zhvillimit ekonomik. Ai shtoi se vendi i tij ka nevojë për një mundësi të re për jetë, duke kujtuar se presidenti amerikan Donald Trump i ka hequr pjesërisht sanksionet, por Kongresi duhet të punojë për t’i hequr ato plotësisht dhe përfundimisht.
Sa i përket çështjeve të brendshme, Shar’a bëri të ditur formimin e komisioneve për hetimin e ngjarjeve në bregdet dhe në Suvejda, si dhe lejimin e hyrjes së komisioneve hetimore ndërkombëtare, duke theksuar angazhimin e shtetit për të ndëshkuar çdo palë që sulmon civilët, edhe nëse ajo vjen nga rrethi më i afërt. Ai nënvizoi se monopolizimi i armëve në duart e shtetit është garancia për shmangien e konflikteve, ndërsa oferta mbetet e hapur për “SDF”-në që të integrohet në ushtrinë siriane me garancinë e të drejtave të kurdëve.
Në planin politik, presidenti sirian hodhi poshtë parimin e ndarjes së pushtetit sipas kuotave, duke e konsideruar pjesëmarrjen dhe krijimin e një qeverie me kompetenca si rrugën më të përshtatshme për menaxhimin e kësaj faze. Ai gjithashtu theksoi se Siria synon marrëdhënie të qeta dhe normale me të gjitha shtetet, larg të qenit burim kërcënimi për cilindo palë.
Sa i përket qëndrimit ndaj Izraelit, Shar’a tha se pushtimi në Golanin sirian vazhdon, pavarësisht se Kombet e Bashkuara e kanë njohur sovranitetin sirian mbi të. Ai vuri në dukje se Damasku po shkon drejt qetësimit dhe shmangies së luftës, pasi vendi është në një fazë rindërtimi. Megjithatë, ai nguli këmbë për domosdoshmërinë e tërheqjes së Izraelit nga territoret siriane, duke shtuar: “Mund të trajtojmë shqetësimet e sigurisë përmes bisedimeve, por mbetet pyetja: a ka Izraeli me të vërtetë shqetësime të sigurisë, apo ambicie zgjeruese? Këtë do ta zbulojnë bisedimet e ardhshme.”
/Siria Online/
