Bashkimi Demokratik për Integrim, 14 vjet në pushtet, asnjëherë nuk arriti të vendos një shqiptar në krye të shërbimeve intelegjente.
Një javë më parë, qeveria e Zoran Zaevit emëroi shefat e ri të Kundërzbulimit dhe të Byrosë për Siguri Publike. Edhe këtë herë, asnjë shqiptar në postin drejtues të shërbimit sekret të shtetit. Në vend të Mitko Çavkovit u zgjodh Goran Nikollovski, ndërsa Llaze Vellkovski i zuri karrigen Vlladimir Atanasovit.
Partneri qeverisës i Zaevit, Ali Ahmeti thotë se ka lëshuar pe, pasi që situata nuk ka qenë e mirë për të vendosur kushte, përv t’i kërkuar të paktën njërën nga këto drejtori kyçe.
“Nuk ka të bëjë as me mungesë të vullnetit e as nuk ka të bëj me mungesë të kuadrove dhe kualifikimit të kuadrove, ka të bëj me rrethanat politike në vend. BDI-ja nuk është një parti politike e cila në momentin kur rrethanat janë shumë të ashpërsuara dhe shumë të ngarkuara dhe tani të vendos kushte. Ne kemi mundur të drejtojmë MPB-në ashtu siç e drejtuam gati gjashtë muaj, kemi drejtuar Ministrinë e Mbrojtjes dhe tani shqiptarët po drejtojnë Kuvendin e RM-së”, u shpreh Ali Ahmeti.
Zëvendëskryeministri nga radhët e BDI-së, Bujar Osmani nuk ndjen aspak xhelozi për faktin që gjatë më shumë se një dekade qeverisjeje, asnjëherë kuadrot e tyre nuk kanë udhëhequr me shërbimin sekret të shtetit.
“Në një qeveri ku ka marrëveshje për partneritet të sinqertë është pak e rëndësishme se cila parti udhëheq me një institucion. Të gjithë duhet të punojnë në drejtim të realizimit të programit të përbashkët qeveritar që del nga programet e partive politike”, tha Bujar Osmani.
Ish-drejtorët Mitko Çavkov dhe Vlladimir Atanasov, janë propozuar dhe emëruar nga VMRO-DPMNE-ja gjatë kohës së qeverisjes teknike. Që të dy përmenden në raportin e grupit punues të MPB-së për mosintervenimin e rregullt dhe në kohë për dhunën në Kuvend më 27 prill. Madje për këtë rast, ish-ministri i brendshëm Agim Nuhiu kërkoi dorëheqjen e drejtorit të Drejtorisë për Siguri dhe Kundërzbulim Mitko Çavkov. Ndërsa Atanasovki ishte kritikuar edhe për pengesat që i ka bërë Prokurorisë Speciale. /tesheshi.com/
