Më shumë se 40 vende i kanë bërë thirrje Kinës që të lejojë Komisionerin e KB për të Drejtat e Njeriut hyrjen urgjente në rajonin e Xinjiang, për të marrë parasysh raportet se më shumë se një milion njerëz atje janë burgosur ilegalisht, torturuar ose detyruar të punojnë.
Deklarata e përbashkët mbi Kinën u lexua para Këshillit të të Drejtave të Njeriut nga KB nga ambasadori kanadez Leslie Norton në emër të një numri vendesh, përfshirë Australinë, Britaninë e Madhe, Francën, Gjermaninë, Japoninë dhe Shtetet e Bashkuara.
Pekini zyrtar mohon të gjitha akuzat për abuzim me ujgurët dhe i përshkruan kampet si “qendra të formimit profesional”.
“Raportet e besueshme tregojnë se më shumë se një milion njerëz janë arrestuar në Xinjiang dhe se ka një mbikëqyrje të gjerë që synon në mënyrë proporcionale Ujgurët dhe anëtarët e pakicave të tjera, si dhe kufizime mbi liritë themelore dhe kulturën ujgure”, thuhej në deklaratën e përbashkët.
“Ne i bëjmë thirrje Kinës që të lejojë vëzhgues të pavarur, përfshirë Komisionerin e Lartë, hyrje urgjente dhe të papenguar në Xinjiang,” shtoi deklarata, duke aluduar tek Komisionerja e Lartë e KB për të Drejtat e Njeriut Michelle Bachelet.
Bachelet të hënën shprehu shpresën se do të arrihej një marrëveshje mbi kushtet e vizitës së saj në Kinë këtë vit, për shkak të shqyrtimit të raporteve të shkeljeve serioze të të drejtave të ujgurëve muslimanë. /tesheshi.com/
