Falënderimi i takon Allahut, Zotit të botëve, dhe paqja e bekimet qofshin mbi zotërinë tonë Muhamedin, mbi familjen dhe mbi shokët e tij të gjithë.
Allahu i Lartësuar thotë:
“E kush është më zullumqar se ai që pengon që në xhamitë e Allahut të përmendet emri i Tij dhe përpiqet për shkatërrimin e tyre? Ata nuk duhet të hyjnë në to veçse me frikë. Për ta në këtë botë ka poshtërim, ndërsa në botën tjetër dënim të madh.”
(El-Bekare: 114)
Lidhja e Dijetarëve Myslimanë po ndjek me shqetësim veprimin e autoriteteve të pushtimit për mbylljen e Xhamisë së Bekuar Al-Aksa, me pretekstin e shpalljes së gjendjes së jashtëzakonshme, duke nxjerrë jashtë besimtarët, punonjësit e gjykatave fetare dhe shkollave, duke lënë brenda vetëm rojet. Ky hap konfirmon politikën e imponimit të dominimit dhe kontrollit mbi xhaminë e bekuar.
Kjo konsiderohet një agresion i hapur dhe një shkelje e qartë e shenjtërisë së vendeve të shenjta dhe të drejtave të myslimanëve.
Mbyllja e Xhamisë së Bekuar Al-Aksa është një krim i madh, për shkak se pengon përmendjen e Allahut në shtëpitë e Tij dhe cenon të drejtën e myslimanëve për adhurimin e tyre. Ajo gjithashtu është një shkelje e shenjtërisë së një vendi që Allahu e ka madhëruar në Librin e Tij, ku thotë:
“I Lartësuar është Ai që e mori robin e Tij natën nga Xhamia e Shenjtë në Xhaminë Al-Aksa, rrethinën e së cilës e kemi bekuar.”
(El-Isra: 1)
Po ashtu, Profeti ﷺ ka thënë në sunetin e tij:
“Nuk ndërmerret udhëtim (i veçantë për adhurim) përveçse drejt tre xhamive: Xhamisë së Shenjtë (në Mekë), kësaj xhamie sime (në Medinë) dhe Xhamisë Al-Aksa.”
(E transmetojnë Buhariu dhe Muslimi)
Vazhdimi i mbylljes së xhamisë, sidomos në këto ditë të bekuara, dhe privimi i dhjetëra mijëra myslimanëve nga falja e namazeve të jacisë dhe teravive në të, përbën një përshkallëzim të rrezikshëm dhe një përpjekje për të imponuar një realitet të ri që bie ndesh me statusin fetar dhe historik të Xhamisë Al-Aksa, si dhe minon kompetencat e vakëfeve islame në administrimin e saj.
Prandaj, Lidhja e Dijetarëve Myslimanë thekson sa vijon:
Së pari: Mbyllja e Xhamisë së Bekuar Al-Aksa dhe ndalimi i besimtarëve për të hyrë në të është vepër mëkatare dhe agresion i qartë, që hyn në kuptimin e fjalës së Allahut:
“E kush është më zullumqar se ai që pengon që në xhamitë e Allahut të përmendet emri i Tij.”
Dhe është një nga format më të mëdha të pengimit nga rruga e Allahut.
Së dyti: I kërkohet autoritetit të pushtimit që ta hapë menjëherë xhaminë për besimtarët, pa kufizime dhe pa pretekste.
Së treti: Mbrojtja e vendeve të shenjta është detyrë fetare dhe morale. Lidhja i bën thirrje mbarë umetit islam, qeverive, dijetarëve, institucioneve dhe popujve, që të marrin përgjegjësitë e tyre për mbrojtjen e Xhamisë së Bekuar Al-Aksa.
Në përfundim të deklaratës së saj, Lidhja thekson se Xhamia e Bekuar Al-Aksa është amanet mbi qafën e gjithë umetit dhe se neglizhenca ndaj shenjtërisë së saj apo heshtja për mbylljen e saj është një krim për të cilin umeti do të pyetet para Allahut, të Vetmit dhe të Gjithëpushtetshmit.
Ne i bëjmë thirrje myslimanëve në lindje dhe në perëndim të botës që ta mbështesin Al-Aksan me lutje të sinqerta, veprim të përgjegjshëm dhe mobilizim të vetëdijshëm e të ligjshëm, si dhe të intensifikojnë përpjekjet popullore dhe zyrtare për mbrojtjen e vendeve të shenjta të umetit dhe ruajtjen e identitetit të tij.
O Allah, ne të marrim Ty dëshmitar se e kemi përcjellë këtë mesazh; o Allah, dëshmo!
O Allah, ruaje Xhaminë Al-Aksa dhe banorët e saj, forcoji ata që qëndrojnë vigjilentë në të, mbroji nga e keqja e agresorëve, ktheje kurthin e atij që dëshiron t’i bëjë dëm kundër vetes së tij dhe largoje prej saj padrejtësinë në mënyrën më të mirë.
Paqja dhe bekimet e Allahut qofshin mbi zotërinë tonë Muhamedin, mbi familjen dhe shokët e tij.
Këshilli i Lartë i Lidhjes së Dijetarëve Myslimanë
14 Ramazan 1447 H
Që përkon me 3 mars 2026.
