Komisioni Evropian po kërkon hapa “konkretë, të saktë dhe të prekshëm” nga Izraeli për të lejuar aksesin e ndihmës humanitare në Rripin e Gazës, tha të martën komisioneri i tij Wopke Hoekstra.

Në një debat mbi situatën në Lindjen e Mesme në Parlamentin Evropian në Strasburg, komisioneri holandez tha se Komisioni është veçanërisht i shqetësuar për situatën humanitare në Gaza dhe se po i kërkon Izraelit të ndërmarrë hapa “konkretë, të saktë dhe të prekshëm” për të mundësuar aksesin në ndihmë për enklavën palestineze.

Nëse kjo nuk ndodh, Gaza përballet me një “kolaps total humanitar”, përfundoi ai.

Në debat u përfshi edhe eurodeputeti Tonino Picula, i cili tha se kryeministri izraelit Benjamin Netanyahu “po nxit konflikt me qëllim që të transformojë vetë Izraelin duke vendosur dominim mbi një zonë më të gjerë”.

“Po merr hak ndaj të gjithë popullit palestinez”, tha Picula.

Deputeti kroat pyeti veten nëse BE mund ta kapërcente “shqetësimin e saj të thellë” të përhershëm për situatën në rajon, pasi nuk ka qenë në gjendje të bjerë dakord për qëndrime të përbashkëta më parë.

“BE-ja si një ‘fuqi e butë’ po dështon qartë të ndërmjetësojë në konfliktin midis ‘fuqive të forta’”, tha Picula, duke bërë thirrje për veprime më vendimtare nga aleanca evropiane.

Eurodeputeti gjerman Michael Gahler tha se “Ishte tronditëse të shihje Trumpin dhe Netanyahun duke përtypur biftek dhe duke diskutuar të ardhmen e atyre njerëzve. Ne nuk mund të biem dakord për zhvendosjen dhe deportimet”, tha ai.

Eurodeputeti grek, Yannis Maniatis, nga radhët e Socialistëve dhe Demokratëve, tha se situata në Lindjen e Mesme ka ekspozuar “dobësinë e BE-së” dhe rolin inekzistent të aleancës në ngjarjet në këtë rajon jashtëzakonisht të rëndësishëm.

“Evropa duhet të veprojë dhe të tregojë se mbështet ligjin humanitar kudo, jo vetëm në raste të caktuara”, tha greku.

Gjatë debatit, të djathtët evropianë mbështetën Izraelin. Eurodeputeti holandez i Patriotëve për Evropën (PfE), Sebastiaan Stoteler, tha se “ne duhet të mbështesim Izraelin dhe SHBA-në në përpjekjen e tyre për të sjellë rend”, përfundoi ai.