Autoritetet policore kanë raportuar se ngjarja tragjike ka ndodhur në qendër të Prizrenit, ndërsa dyshohet se vdekja ka ardhur si pasojë e thithjes së tymit.
Në Prizren, në afërsi të Shtëpisë së Kulturës, ka shpërthyer një zjarr i madh në një objekt banimi, ku si pasojë ka ndërruar jetë një fëmijë rreth moshës njëvjeçare.
Zëdhënësi i Policisë për rajonin e Prizrenit, Shaqir Bytyqi, ka bërë të ditur për KosovaPress se edhe tre fëmijë të tjerë janë shpëtuar dhe aktualisht po marrin trajtim mjekësor.
“Sot, më datë 30.12.2025, rreth orës 10:00, është raportuar për një zjarr në një shtëpi banimi në qendër të qytetit të Prizrenit. Si pasojë e zjarrit, një fëmijë rreth moshës njëvjeçare ka humbur jetën, ndërsa dyshohet se vdekja ka ardhur si pasojë e thithjes së tymit. Tre fëmijë të tjerë janë shpëtuar dhe janë dërguar për trajtim mjekësor në Emergjencë, ku po marrin kujdesin e nevojshëm shëndetësor”, ka deklaruar Bytyqi.
Ai ka shtuar se njësitë emergjente kanë reaguar menjëherë dhe zjarri është lokalizuar pothuajse plotësisht, ndërsa ekipet përkatëse vazhdojnë të jenë në vendin e ngjarjes.
