Grupi palestinez Hamas publikoi një video të premten që tregon pengun izraelit Guy Gilboa-Dalal dhe një të burgosur tjetër duke lëvizur nëpër rrënojat e shtëpive të shkatërruara në Qytetin e Gazës, i cili është nën sulme intensive izraelite.
“Mendonim se ishim të burgosur të Hamasit, por e vërteta është se jemi të burgosur të qeverisë sonë. Duam që kjo të mbarojë dhe të kthehemi te familjet tona”, tha Gilboa-Dalal në video.
Ai theksoi se po qëndron në Gaza pavarësisht ofensivës izraelite dhe fajësoi qeverinë e udhëhequr nga kryeministri Benjamin Netanyahu për rrezikimin e jetës së tij.
“Jam i tmerruar nga sulmi i ushtrisë izraelite në Qytetin e Gazës. Do të thotë që ne do të vdesim këtu“, tha ai.
Gilboa-Dalal akuzoi gjithashtu udhëheqësit izraelitë se gënjejnë dhe neglizhojnë mirëqenien e ushtarëve dhe pengjeve.
“Netanyahu, Ben-Gvir dhe Smotrich gënjejnë vazhdimisht. Ata nuk duan që ne të kthehemi”, tha ai. Pengu u bëri thirrje qytetarëve izraelitë të “protesojnë fuqishëm, të krijojnë kaos dhe të shkaktojnë probleme për qeverinë që të na lirojë dhe të ndalojë luftën”.
Videoja tregon gjithashtu takimin e Gilboa-Dalala me një rob tjetër, identiteti i të cilit nuk është zbuluar.
Më 18 gusht, grupi palestinez i rezistencës Hamas pranoi një propozim për armëpushim të propozuar nga ndërmjetësit egjiptianë dhe katarianë. Ndërsa Izraeli nuk i është përgjigjur propozimit, Netanyahu ka urdhëruar që plani për të pushtuar Qytetin e Gazës të vazhdojë.
“Shenja e jetës e shpallur këtë mëngjes është një tjetër kujtesë e dhimbshme se Izraeli duhet të kthehet në negociata për të kthyer pengjet dhe të përpiqet të arrijë një marrëveshje”, shkroi udhëheqësi i opozitës Yair Lapid në X. “Ne duhet të bëjmë gjithçka për t’i sjellë ata në shtëpi. Ne u dërgojmë forcë familjeve, ju nuk jeni vetëm, ne jemi me ju.”
Ndërkohë, më shumë se 10,400 palestinezë mbahen në burgjet izraelite, ku i nënshtrohen torturës, urisë dhe neglizhencës mjekësore, duke rezultuar në shumë vdekje, sipas raporteve dhe mediave palestineze dhe izraelite për të drejtat e njeriut.
Izraeli ka vrarë më shumë se 64,200 palestinezë në Gaza që nga tetori i vitit 2023. Fushata ushtarake e ka shkatërruar enklavën, e cila po përballet edhe me urinë. /tesheshi.com/
