Qeveria spanjolle ka reaguar ashpër ndaj sulmit ajror të ushtrisë izraelite mbi spitalin “Nasser” në qytetin Khan Younis të Rripit të Gazës, ku u vranë civilë dhe pesë gazetarë, duke e cilësuar ngjarjen si shkelje të qartë të ligjit ndërkombëtar humanitar.
Në një deklaratë të Ministrisë së Jashtme të Spanjës theksohet: “Qeveria spanjolle dënon sulmin izraelit ndaj spitalit ‘Nasser’ në Gaza, i cili çoi në humbjen e jetës së disa gazetarëve dhe civilëve të pafajshëm. Zonat e mbrojtura posaçërisht nuk mund të kthehen në objektiva. Ky është një akt i papranueshëm dhe duhet të hetohet”.
Deklarata shton se “vuajtjet e shkaktuara nga vdekjet e civilëve rëndohen edhe më shumë nga humbjet në mesin e punonjësve të medias, puna e të cilëve është thelbësore dhe kërkon mbrojtje të veçantë. Spanja riafirmon angazhimin e saj të plotë për të drejtën e qasjes në informacion, e cila është kusht për garantimin e lirisë së shprehjes dhe të drejtës së qytetarëve për t’u informuar”.
Sulmi, që sipas raporteve u krye me dy bombardime të njëpasnjëshme mbi katin e katërt të spitalit, shkaktoi vdekjen e 20 personave dhe plagosi dhjetëra të tjerë. Mes viktimave ishin edhe pesë gazetarë: fotoreporteri i Reuters, Hossam al-Masri; kameramani i Al Jazeera, Mohammed Salameh; gazetarja Maryam Abu Deqqa, bashkëpunëtore e Independent Arabia dhe Associated Press; gazetari i NBC News, Moaz Abu Taha; dhe gazetari Ahmed Abu Aziz.
