Analizë politike nga Dr. Iyad Al-Qara
Gjithnjë e më shumë po shtohen sinjalet që tregojnë për mundësinë e arritjes së një marrëveshjeje të re për shkëmbimin e të burgosurve. Megjithatë, kjo mundësi mbetet e lidhur ngushtë me natyrën e propozimit të rishikuar egjiptian, i cili, sipas burimeve, është rezultat i presionit të drejtpërdrejtë që presidenti amerikan Donald Trump ushtroi ndaj kryeministrit izraelit Netanyahu gjatë takimit të tyre të fundit – një takim që u përshkrua si i tensionuar.
Të dhënat aktuale sugjerojnë se Izraeli është më afër se kurrë më parë për të pranuar propozimin e rishikuar, të cilin Egjipti e ka paraqitur pas refuzimit izraelit ndaj versionit të mëparshëm. Burime pranë negociatave bëjnë me dije se lëvizja Hamas pritet të marrë zyrtarisht këtë propozim brenda orëve të ardhshme.
Por pranim i tij nga ana palestineze do të varet nga disa kushte thelbësore:
• Së pari, propozimi duhet të përfshijë një angazhim të qartë për të kaluar menjëherë në fazën e dytë të negociatave pas përfundimit të fazës së parë.
• Së dyti, zbatimi i marrëveshjeve të mëparshme, përfshirë ndalimin e agresionit, hapjen e pikave kufitare dhe lehtësimin e ndihmave humanitare.
• Së treti, nevoja për garanci të forta që do të parandalojnë përsëritjen e taktikave bllokuese nga ana e Izraelit, sikurse ndodhi në fazën e parë, kur u tërhoq nga zbatimi sapo mori të burgosurit e vet.
Kushti kryesor i Hamasit mbetet qartësia në rrugën drejt ndalimit të plotë të luftës. Lëvizja nuk e sheh marrëveshjen si një instrument për t’iu shmangur kërkesave palestineze apo për të riprodhuar konfliktin nën mbulesën e negociatave.
Nga ana e saj, Hamas nuk ka shprehur kundërshti thelbësore lidhur me numrin apo mekanizmin e shkëmbimit të të burgosurve dhe ka treguar një fleksibilitet të dukshëm në këtë aspekt gjatë raundeve të mëparshme. Problemi qëndron te qëllimi politik i Izraelit dhe nëse është vërtet i përkushtuar për zbatimin e plotë të marrëveshjes, pa shmangie apo ndarje në faza.
Duke u bazuar në zhvillimet aktuale, një marrëveshje duket e mundshme, por pengesat mbeten në detaje dhe në siguritë që do të ofrohen. Situata po zhvillohet si një garë mes fleksibilitetit të rezistencës palestineze dhe përpjekjeve të Izraelit për të fituar kohë dhe terren.
Orët në vijim do të jenë vendimtare. Topi tani është në fushën e ndërmjetësuesve, të cilët duhet të paraqesin një formulë që garanton të drejtat, detyron Izraelin dhe hap një rrugë serioze drejt përfundimit të luftës – jo drejt arsyetimit të saj të përsëritur.
