Nga Ankaraja, thirrje për unitet të vende islame përballë Izraelit
Një fjalim i presidentit turk Erdogan një ditë më parë tërhoqi vëmendje mediatike mbi faktin se ai e quajti Hamasin një organizatë çlirimtare, por më shumë se kaq, pati mesazhe të tjera të mprehta.
Ai tha se vendi i tij nuk do ta lejonte kurrë Izraelin të kryente krime.
Pothuajse gjysma e të vrarëve në sulmet e Izraelit në Gaza deri më tani kanë qenë fëmijë, gjë që tregon se qëllimi është brutaliteti i planifikuar për të kryer krime kundër njerëzimit, shtoi Erdogan.
Ai vuri në dukje se ata që dolën në mbrojtje të botës në luftën e Rusisë kundër Ukrainës tani heshtin për masakrën në Gaza, e cila, tha ai, është “shprehja më konkrete e hipokrizisë”.
Ai akuzoi vendet jashtë rajonit të Lindjes së Mesme se vetëm “i hedhin benzinë zjarrit” duke mbështetur Izraelin, duke shtuar se Shtetet e Bashkuara të Amerikës gjithashtu do të humbasin sepse nuk duan që bota të drejtohet me drejtësi.
Ai theksoi se Ankaraja zyrtare është veçanërisht e prekur nga pafuqia në të cilën ka rënë Organizata e Kombeve të Bashkuara (OKB) dhe askush nuk e merr më seriozisht, sepse OKB-ja i ka mbyllur sytë para vrasjeve brutale të fëmijëve.
Kritikat e Turqisë për strukturën e padrejtë të Këshillit të Sigurimit të OKB-së janë konfirmuar sërish nga zhvillimet e fundit, shtoi presidenti turk dhe kujtoi se një nga pesë anëtarët e përhershëm të Këshillit të Sigurimit vuri veton ndaj rezolutës për armëpushim në Lindjen e Mesme.
Erdogan përsëriti sloganin e tij të famshëm për reformën e OKB-së, duke thënë: “Bota është më e madhe se pesë”, duke aluduar për pesë anëtarët e përhershëm me veto të Këshillit të Sigurimit të OKB-së.
“Sulmet izraelite në Gaza janë për ata që i kryejnë dhe për ata që i mbështesin një shenjë e një gjendjeje vrasjeje dhe sëmundjeje mendore”, shtoi ai.
Erdogan tha gjithashtu se “veprimet e përbashkëta të vendeve islamike së pari do të çonin në një armëpushim dhe më pas në paqe të përhershme në Lindjen e Mesme”.
Populli hebre e di shumë mirë se Turqia është i vetmi vend që ka qenë pa antisemitizëm për shekuj, shtoi Erdogan.
“Unë u bëj thirrje të gjitha vendeve me arsye dhe ndërgjegje që të bëjnë presion mbi qeverinë e Netanyahut për ta kthyer shtetin e Izraelit në sensin e tij të shëndoshë,” vuri në dukje ai.
Ai tha se Turqia është e gatshme të jetë një nga garantuesit e paqes për palën palestineze, me kapacitetet e saj humanitare, politike dhe ushtarake. /tesheshi.com/
