Telefonat e mençur janë një pjesë e pazëvendësueshme e jetës për shumë në ditët e sotme, dhe praktika e karikimit të pajisjes brenda natës është bërë normë.
Ofron komoditetin e fillimit të ditës me një bateri të plotë, gjë që e bën jetën më të lehtë për shumë njerëz.
Por Apple i këshillon blerësit e iPhone ndryshe, transmeton Telegrafi.
Apple thotë se duhet të shmangni karikimin e pajisjes së tyre gjatë kohës sa jeni në gjumë, dhe në mënyrë specifike thekson se nuk është ide e mirë ta lini atë nën një batanije ose jastëk ndërsa është i lidhur me karikuesin.
Rrjedha e ajrit është padyshim një problem i madh pasi karikuesi duhet të jetë në një “zonë të ajrosur mirë kur përdoret ose ngarkohet” për të shmangur mbinxehjen dhe rrezikun e zjarrit.
Mesazhi kryesor i kompanisë teknologjike është ky: “Mos flini mbi pajisjen, përshtatësin e energjisë ose karikuesin, ose mos e vendosni nën një batanije, jastëk ose trupin tuaj kur është i lidhur në një burim energjie”, raporton LAD Bible.
Janë publikuar edhe disa këshilla për karikimin e sigurt
Në vend të kësaj, ata këshillojnë: “Mbani iPhone tuaj, përshtatësin e energjisë dhe çdo karikues në një zonë të ajrosur mirë gjatë përdorimit ose karikimit. Jini veçanërisht të kujdesshëm nëse keni një gjendje fizike që ndikon në aftësinë tuaj për të zbuluar nxehtësinë “.
Por këshillat e tyre nuk mbarojnë këtu pasi ata ndanë disa këshilla të tjera për karikimin e sigurt, duke përfshirë përdorimin e kabllos së karikimit që vjen me telefonin dhe përshtatësin e energjisë USB të Apple që mund të blihet veçmas.
Keni humbur karikuesin tuaj origjinal? Apple këshillon zëvendësimin me një karikues ose kabllo Made for iPhone dhe adaptorë rryme të palëve të treta që janë “në përputhje me USB 2.0 ose më vonë”.
Gjithashtu duhet të ketë “rregulloret kombëtare të zbatueshme dhe standardet ndërkombëtare dhe rajonale të sigurisë”. /Telegrafi/
