Shija e veçantë e çokollatës që na josh prej në moshë të vogël është ndër industritë më të mëdha në botë në sektorin e ushqimit. TRT Balkan ju sjell listën e eksportuesve dhe importuesve më të mëdhenj, dhe popujt që konsumojnë më shumë këtë produkt.
Çokollatat janë ndër shijet më të preferuara për shumicën e njerëzve që në moshën fëmijërore. Ky produkt ushqimor industrial ka për bazë kakaon, ndërsa konsumohet në forma të ndryshme, qoftë si desert në vete ose si shtojcë në pjata të tjera.
Sipas literaturës, njerëzimi ka konsumuar kakaon në ndonjë lloj forme edhe 2 mijë vjet para erës sonë.
Por, cilat shtete janë sot tregtarët më të mëdhenj të kakaos, dhe cilat e konsumojnë atë më së shumti?
Gjermania eksporton më së shumti, Turqia e 8-ta në botë
Sipas faqes Statista, Gjermania eksporton bindshëm më së shumti çokollatë në botë. Në vitin 2022, Gjermania ka eksportuar mbi 1 milion tonë çokollatë.
Pas saj vijnë Belgjika (594 mijë tonë) dhe Holanda (482 mijë tonë).
Türkiye, me 252 mijë tonë çokollatë të eksportuara në vitin 2022 radhitet e teta në botë për eksportin e çokollatës.
Eksportuesit (milionë kilogramë)
Gjermania 1009
Belgjika 594
Holanda 482
Polonia 456
Italia 415
ShBA-ja 333
Franca 323
Türkiye 252
ShBA-ja, importuesja numër një e çokollatës
ShBA-ja është vendi që importon më së shumti çokollatë në botë. Sipas Statistas, në vitin 2022 ShBA-ja ka importuar 746 mijë tonë çokollatë, ndërsa ka eksportuar 333 mijë tonë.
Ndër importuesit më të mëdhenj janë edhe Franca (547 mijë tonë) dhe Gjermania (526 mijë tonë).
Importuesit (milionë kilogramë)
ShBA-ja 746
Franca 547
Gjermania 526
Holanda 347
Belgjika 260
Zviceranët, të dashuruarit pas çokollatës
Sa i përket konsumit të çokollatës, zviceranët janë bindshëm në vend të parë. Gjatë vitit 2022, një zviceran ka konsumuar mesatarisht 11,8 kilogramë çokollatë, duke shpenzuar rreth 280 dollarë vetëm për këtë produkt.
Pas Zvicrës vijnë amerikanët, të cilët konsumojnë mesatarisht 9 kilogramë çokollatë për kokë banorë. Mesatarisht një amerikan shpenzon rreth 155 dollarë në vit për çokollata.
Gjermanët, francezët dhe britanikët plotësojnë top 5-shen botërore për konsumin e çokollatës.
Konsumuesit (kilogramë për kokë banori)
Zvicra 11,8
ShBA-ja 9
Gjermania 5,8
Franca 3,6
Britania 2,9
TRT Balkan
