Presidenti i Francës, Emmanuel Macron ka ringjallur një ide të vjetër dekadash me një propozim për një formë të re të bashkëpunimit evropian që shkon përtej BE-së, por detajet se si do të funksiononte një mekanizëm i tillë mbeten të errëta dhe gjithashtu të diskutueshme.
Për listën gjithnjë në rritje të vendeve anëtare aspirante, madje edhe Britaninë pas Brexit, një klub më i gjerë evropian mund të ofrojë një alternativë për koordinimin për çështjet politike dhe të sigurisë, ndërsa ata vende presin anëtarësimin që shpesh mund të zgjasë me vite, transmeton Telegrafi.
Por propozimi i Macron, i paraqitur në një fjalim kryesor në Parlamentin e BE-së të hënën, ka shkaktuar tashmë polemika mbi perspektivën që mund t’i ofrohet Ukrainës në vend të anëtarësimit të plotë.
“Ideja mund të jetë një kompromis pozitiv, me kusht që t’i jepet thelbi dhe përmbajtje”, tha Christine Verger, nënkryetare e Institutit Evropian, Jacques Delors.
Por pyetjet mbeten mbi çështjet qendrore të tilla si nëse klauzola e ndihmës reciproke në traktatin e BE-së do të zbatohej për anëtarët e këtij komuniteti të ri hipotetik, shtoi Verger.
Ukraina, e cila po lufton me pushtimin e Rusisë, po kërkon anëtarësim të shpejtë në BE, por Macron hodhi poshtë të hënën një proces të shpejtë aplikimi, duke sugjeruar se një klub më i gjerë dhe i ndryshëm do të ishte më efikas dhe se Kievit mund t’i duhen dekada për t’u bashkuar me BE-në.
Por Ukraina paralajmëroi se një bllok i ri nuk mund të jetë një zëvendësues për anëtarësimin në BE, pasi ajo pret vendimin e Komisionit Evropian nëse do t’i japë vendit statusin e kandidatit që pritet në qershor.
“Nëse nuk e marrim statusin e kandidatit, kjo do të thotë vetëm një gjë, se Evropa po përpiqet të na mashtrojë. Dhe ne nuk do ta gëlltisim atë”, i tha Financial Times, ministri i Jashtëm i Ukrainës, Dmytro Kuleba.
Presidenti i Lituanisë, Gitanas Nauseda, shtoi se ideja e Macron ishte “një përpjekje për të mbuluar mungesën e dukshme të vullnetit politik për të marrë vendime vendimtare për dhënien e statusit të kandidatit” për Ukrainën.
Megjithatë Macron i tha parlamentit në Strasburg se BE-ja, “duke pasur parasysh nivelin e saj të integrimit dhe ambicieve”, nuk mund të jetë organi i vetëm organizues i Evropës.
Presidenti i Francës, i ri nga fitorja e tij në rizgjedhje ndaj ekstremit të djathtë muajin e kaluar, përmendi sigurinë, energjinë, transportin dhe lëvizjen përtej kufijve si çështje që organi mund të trajtojë.
Një bllok i ri evropian do të zgjidhte gjithashtu pjesërisht çështjen e mprehtë të zgjerimit të BE-së, me Parisin që frikësohej se një BE gjithnjë në rritje do të ngadalësonte institucionet tashmë të bllokuara evropiane.
Franca, por edhe Danimarka dhe Holanda, janë skeptike se duke përshpejtuar aplikimin e Ukrainës, Kievi nuk do të kishte kohë për të përfunduar reformat thelbësore politike. /Telegrafi/
