Gëzimi me Islamin – Hoxhë Bekir Halimi

​​Nëse të kaplon ndonjë brengë, trishtim apo ngushtim, kujtoje gëzimin e imanit dhe mirësinë që Allahu ta ka dhuruar me Islamin.

​Kujto se si Ai të udhëzoi, të zgjodhi dhe të bëri prej myslimanëve.

​Vërtet, gëzimi për këtë mirësi ka një fuqi të jashtëzakonshme për ta larguar çdo pikëllim.

​Ka thënë imam Ibën Kajimi — Allahu e mëshiroftë:

​“E pashë në ëndërr Shejhul-Islam ibën Tejmijen (Allahu e lartësoftë në Xhenet). M’u duk sikur i përmenda disa prej veprave të zemrës dhe fillova të flas për madhështinë dhe dobinë e tyre por tani nuk e kujtoj se për cilën vepër bëhej fjalë.

​Atëherë ai tha:

​‘Sa për mua, rruga ime është gëzimi me Allahun dhe lumturia në afërsinë e Tij.’

​Ose tha fjalë me këtë kuptim.

​Dhe kështu ishte gjendja e tij edhe në jetën e kësaj bote. Kjo dukej qartë në pamjen e tij dhe e dëshmonte vetë gjendja e tij.”

​Sa herë që të rëndojnë sprovat, mos harro se një nga mirësitë më të mëdha që Allahu t’i ka dhuruar është Islami. Gëzohu me Allahun, me udhëzimin e Tij dhe me faktin që Ai të bëri prej atyre që e njohin dhe e adhurojnë Atë. Ky është gëzimi që nuk shuhet me ndryshimin e rrethanave dhe as me vështirësitë e jetës.

​— Bekir Halimi