Presidenti i Serbisë, Aleksandar Vuçiq, në takimin me ambasadorin e Rusisë, ka përsëritur se vendi i tij do të vazhdojë të ruajë miqësitë dhe partneritetet tradicionale me Rusinë dhe Kinën.
Sipas mediave serbe, përcjell Telegrafi, gjatë takimit me Aleksandar Bocan-Kharchenko, presidenti serb theksoi “vendosmërinë e palëkundur të lidershipit shtetëror të Serbisë për të ruajtur paqen dhe stabilitetin në rajon me veprimet e veta”.
Siç thuhet më tej, ambasadori rus e uroi Vuçiqin për rizgjedhjen në krye të shtetit, ndërsa duke falënderuar për urimet, presidenti serb tha se “Serbia në rrugën e saj evropiane do të vazhdojë të ruajë miqësitë dhe partneritetet tradicionale me Rusinë dhe Kinën”, thuhet në deklaratë.
Ndërkohë theksohet se në takim është biseduar për zhvillimin e mëtutjeshëm të marrëdhënieve dypalëshe serbo-ruse, duke përfshirë edhe fushën e energjisë, me shpresën se së shpejti do të fillojnë bisedimet për sasitë, çmimet dhe kushtet e tjera të furnizimit me gaz.
Gjatë takimit, Bocan-Kharchenko foli për mënyrën sesi Rusia e sheh konfliktin në Ukrainë dhe Vuçiq shprehu shpresën për një fund të afërt të konfliktit dhe dëshirën për paqe të qëndrueshme. /Telegrafi/
