Prodhuesi kryesor turk i dronëve Baykar ka zbuluar një prototip të një droni turk të quajtur “Bayraktar Kizilelma” (Molla e Kuqe), të cilin kompania e ka zhvilluar me burime vendase.
Duke zhvilluar dronin Bayraktar TB2, i cili përfaqëson një ndryshim rrënjësor në teknologjinë e luftës, Baykar ka lënë pas një fazë të rëndësishme në studimet e avionëve luftarakë pa pilot dhe prototipi i parë i një avioni të tillë tashmë ka hyrë në linjën e integrimit.
Me manovrat e tij agresive dhe inteligjencën artificiale të avancuar, “Bayraktar Kizilelma” do të jetë një nga elementët më të fortë të forcave të sigurisë në fushën e betejës në të ardhmen.
Shefi i teknologjisë së Baykar, Selcuk Bayraktar, njoftoi se ky projekt i sistemit luftarak të dronëve Baykar (MIUS) quhet “Bayraktar Kizilelma”.
“Pas tre vitesh e gjysmë, ‘peshqit’ më të mëdhenj dhe më të shkathët hynë në linjën e prodhimit”, shkruan Bayraktar në rrjetet sociale.
“Ata do të na çojnë gjithmonë përpara dhe në të ardhmen. Me ‘Bayraktar Kizilelma’ duam që kombi ynë, i cili prej shekujsh jeton i lirë, të zërë vendin e merituar në qiell dhe në hapësirë duke zhvilluar teknologjinë e lartë me vizionin e Lëvizjes Kombëtare të Teknologjisë”, tha Bayraktar, duke shtuar:
“Për shkak se menduam se ‘Kizilelma’ do t’i shërbente popullit tonë dhe njerëzimit, zgjodhëm këtë emër që vjen nga e kaluara e qytetërimit tonë të lashtë.
Avionët luftarakë me pilot nuk do të zhvillohen më. Tani e tutje, elementët më të fuqishëm të fushëbetejës do të jenë sistemet pa pilot. Ne po punojmë për ta mbajtur vendin tonë në garë për të ardhmen.”
Punimet e dizajnit konceptual “Bayraktar Kizilelma” u shpërndanë për herë të parë për publikun më 20 korrik 2021 si dhuratë në ditën e parë të Kurban Bajramit. Pas tetë muajsh, droni “Bayraktar Kizilelma” u përfshi në linjën e integrimit.
“Bayraktar Kizilelma”, i cili është i aftë të luftojë ajër-ajër si avionët luftarakë të drejtuar me manovra agresive, do t’i përdorë këto aftësi për të ndryshuar ekuilibrin në fushën e betejës.
Avioni, studimet e zhvillimit të të cilit kryhen tërësisht nga inxhinierë dhe teknikë turq me përvojë të fituar në projektet Bayraktar TB2 dhe Bayraktar Akinci, do të sigurojë efektivitet kundër objektivave ajrore me municion vendas.
Avioni do të përdorë të gjithë municionin e zhvilluar nga inxhinierët turq dhe ngarkesa e planifikuar e tij është 1500 kilogramë.
“Bayraktar Kizilelma” synon të qëndrojë në ajër për gjashtë orë me një rreze misioni prej 500 milje detare (926 kilometra)./aa/
