Synimi është krijimi i një marke globale
Makina e parë turke Togg u ekspozua në panairin më të madh në botë të elektronikës së konsumit “CES 2022” në Las Vegas.
Një deklaratë nga administrata e Togg tha se koncepti i makinës së parë turke u lançua për të krijuar një markë globale, pronësia intelektuale dhe industriale e së cilës është 100 për qind në pronësi të Turqisë dhe që përbën thelbin e ekosistemit të lëvizshmërisë së Turqisë.
Shtohet se Togg, si pjesë e vizionit të tij, prezantoi markën globale në panairin “CES 2022”, një vendtakim i rëndësishëm për kompanitë e teknologjisë.
Nga drejtues të Togg u tha se ata nuk janë një kompani e makinave klasike.
“Ne e përkufizojmë veten si një kompani teknologjike. Kjo është arsyeja pse ne jemi në CES, vendi i takimit të inovacioneve më të fundit në teknologji. Ne jemi një kompani teknologjike që operojmë në fushën e lëvizshmërisë, e themeluar në një zonë gjeografike ku takohen Lindja dhe Perëndimi, arsyeja dhe emocionet. Në botën e re, ku industria e automobilave po transformohet me shpejtësi në një ekosistem lëvizshmërie, ne po krijojmë zgjidhje lëvizshmërie, duke i vendosur përdoruesit dhe të dhënat në fokusin e veprimit”.
Togg njoftoi më parë se do të fillonte prodhimin testues të makinave në fund të korrikut 2022. Kompania synon të prodhojë SUV elektrike C deri në fund të vitit 2022 si pjesë e prodhimit masiv të automjeteve.
Pas përfundimit të testeve të homologimit, SUV-i i parë në segmentin C do të dalë në treg në tremujorin e parë të 2023.
Prototipi i makinës së parë turke u prezantua më 27 dhjetor 2019 në Luginën e Teknologjisë në Gebze, Turqi.
Në tetor 2021, administrata e Togg njoftoi se ishin kryer të gjitha testet aerodinamike dhe aeroakustike të makinës. /tesheshi.com/
