Frika…
Frika është armiku kryesor i njeriut dhe pengesa e parë që i ndalon njerëzit për t’i realizuar ëndrrat e tyre…
Gjenden katër lloje frikash:
a) Frika nga dështimi…
Nëse një person ka kaluar një përvojë dështimi, patjetër do ta shmangë ta përsëritë të njëjtën përvojë, nga frika e mossuksesit, dhe mundet që ky person të programohet që në moshë të re që të mos rrezikojë ose të mos bëjë asnjë aventurë tjetër. Ndoshta ai gjithë jetën e tij, që në vogëli, ka parë të atin i cili gjithë jetën e tij bënte vetëm një lloj pune, duke e përsëritur atë çdo ditë, ose ndoshta është e mundur që babai i tij ta ketë këshilluar që të matet mirë që të mos bjerë në dështim.
b) Frika nga mospranimi…
Kjo lloj frike shkakton që shumë njerëz të shmangin çdo ndryshim në jetën e tyre, rezultati i të cilit mund të jetë refuzimi ose mospranimi… Si shembull për këtë po sjell rastin e një zonje, e cila më kërkoi ta ndihmoja të linte duhanin. Puna me të vërtet pati sukses dhe ajo ishte e lumtur që hoqi dorë nga ky ves i keq. Pas gjashtëmuajsh, ajo më kontaktoi në telefon dhe më kërkoi takim edhe një herë tjetër. Gjatë takimit më tregoi se pasi e kishte lënë duhanin, ajo u përball me një tjetër problem të madh. Shumica e shoqërisë së saj ishin duhanpirës, por tani ata kishin filluar ta shmangnin e të largoheshin prej saj. Ajo kishte filluar të ndjente se ishte e padëshirueshme në mesin e tyre, prandaj kishte vendosur t’i kthehej përsëri pirjes së duhanit, që të ishte përsëri e mirëpritur në mesin e shoqërisë së saj. Unë fillova sërish trajtimin e saj nga kjo lloj frike, dhe besimi në vetvete iu shtua. Ajo nisi të bindej se mund ta linte duhanin, e në të njëjtën kohë të qëndronte me shoqërinë e saj, dhe u bind se nëse e refuzonin, atëherë ata nuk ishin një shoqëri e vërtetë… Sapo iu hoq kjo frikë, ajo e la plotësisht pirjen e duhanit.
c) Frika nga e panjohura…
Kjo frikë mund të të ndalojë nga veprimi. Për ta sqaruar këtë, po sjell një shembull: Më erdhi një burrë, që vuante nga një problem, i cili i shkaktonte ngatërrim dhe dhimbje të fortë. Atij i kishte ardhur një ofertë pune për në Francë, për një periudhë dyvjeçare, por deri tani ai nuk kishte jetuar kurrë në ndonjë vend tjetër jashtë Montrealit, në Kanada… E pyeta: “Cila është gjëja më e keqe që mund të të ndodhë ty, nëse jeton atje?”
Përgjigjja e tij ishte: “Ndoshta e anuloj kontratën pas gjashtë muajsh”… Unë e pyeta: “Cilat janë rezultatet më të mira që mund të të ndodhin, nëse e pranon ofertën?”… Ai u përgjigj që do të mund të vizitonte shumë vende të Europës, përveç shëtitjeve në Francë, plus të ardhurat e pëlqyeshme financiare, dhe pastaj, pas mbarimit të kontratës, do të kthehej në Montreal dhe të fillonte përsëri punën e tij. Pas trajtimit, ai u bind dhe vendosi ta pranonte ofertën, dhe vërtet udhëtoi për në Francë… Ajo që ndodhi në rastin e këtij burri, ishte se ne krijuam një ide për të ardhmen, ku fokusi të ishte i përqendruar tek përfitimet dhe pamë se faktorët e pranimit ishin më të shumtë se faktorët e refuzimit, kështu që e plotësoi periudhën e kontratës bashkë me familjen e tij dhe e shijoi çdo moment të saj; pastaj u kthye dhe filloi përsëri punën e tij në Montreal.
d) Frika nga suksesi…
Kjo lloj frike ekziston vërtet te disa njerëz. Në brendësi të tyre, ata besojnë se suksesi nënkupton dhimbje, ndarje, mashtrim dhe vetmi… Për ilustrim, po sjell një shembull: Në vitin 1996, isha në një vend arab dhe mora një taksi për të vajtur në një nga ligjëratat e mia. Shoferi ishte një burrë në të dyzetat. Ndërsa po udhëtonim, kalon pranë nesh një makinë Mercedes, e madhe. Shoferi i taksisë menjëhe rë tha: “Të gjithë pronarët e këtyre lloj makinave janë hajdutë, që bëjnë çdo gjë vetëm për para.”…
Unë e pyeta: “A do të dëshiroje ta kishe edhe ti një makinë të tillë, në të ardhmen?”..
Ai më shikoi më një shikim, a thua se e fyeva, dhe më tha: “Unë nuk dua të jem hajdut. Jam i lumtur me gjendjen time që kam.”.. Ky burrë besonte se suksesi mund të ishte shkak t’ia ulte njeriut vlerën… Disa njerëz nuk mund ta imagjinojnë veten e tyre të pasur, dhe kur ndodh të fitojnë pak më shumë se zakonisht, ata e shkatërrojnë suksesin e tyre dhe bien pre e shpenzimeve të tepruara e të shpërdorimit… Pra, frika nga suksesi, mund t’i ndalojë njerëzit për t’i vënë në zbatim idetë e tyre.
