Ministri turk për Çështjet e Bashkimit Evropian dhe kryenegociatori Ömer Çelik: Do të ishte vetëvrasje pezullimi ose ndërprerja e negociatave me Turqinë
ANKARA (AA) – Ministri turk për Çështjet e Bashkimit Evropian dhe kryenegociatori Ömer Çelik tha se do të ishte vetëvrasje ndërpreja e negociatave të anëtarësimit të Turqisë.
“Do të ishte vetëvrasje pezullimi ose ndërprerja e negociatave me Turqinë, si një vendim i vetëm i modelit të Evropës që nuk mund të zgjidhë problemet e saj”, tha Çelik, i ftuar në panelin editorial të Anadolu Agency (AA).
“Ndërprerja e ndihmës financiare paraaderimit (IPA) nuk do të thotë asgjë. Vetë përmendja e kësaj është një gjë që diskrediton BE-në”, shtoi ai.
Para samitit të BE-së të enjten e kaluar, Merkel sugjeroi reduktimin e fondeve të paraaderimit, në vend të ndërprerjes së negociatave me Turqinë.
Pavarësisht thirrjeve nga socialdemokratët dhe liberalët gjermanë që menjëherë të ndalojnë bisedimet e anëtarësimit të Ankarasë në BE dhe të ngrijnë katër miliardë euro nga fondet e paraaderimit, shumica e shteteve anëtare të BE-së kanë refuzuar propozimet e tilla dhe mbështesin dialogun me Ankaranë.
Çdo vendim për të përfunduar bisedimet e anëtarësimit të Turqisë kërkon unanimitet midis të gjitha shteteve anëtare të BE. Deri tani, vetëm Austria ka mbështetur haptazi ngrirjen e bisedimeve për anëtarësimin e Turqisë në BE.
Ministri Çelik e ka quajtur si obsesion psikiatrik qëndrimin e Austrisë ndaj Turqisë.
“Nuk mund ta shpjegoj obsesionin e Austrisë (kundër Turqisë) në formën e një analize politike. Ndodhet në situatën ku kjo gjë është bërë plotësisht një obsesion psikiatrik”, tha Çelik.
Ndërkaq, lidhur me propozimin për partneritet të privilegjuar me BE-në, Çelik tha se e quajnë atë një propozim të pamoralshëm.
