Papa Françesku ra dakord të takohej në dhjetor me të mbijetuarit kanadezë të abuzuar në shkollat famëkeqe katolike, në mes të një thirrjeje për të kërkuar falje për rolin e Kishës Katolike në abuzimin dhe vdekjen e mijëra fëmijëve.
Konferenca Kanadeze e Peshkopëve Katolikë tha se Papa kishte ftuar delegacione në Vatikan dhe do të takohej me përfaqësuesit e tre grupeve të popujve indigjenë, Populli i Parë, Metis dhe Inuit, nga 17 deri në 20 dhjetor, njoftoi AP.
Vatikani nuk e ka konfirmuar se takimi do të mbahet, por portali i Selisë së Shenjtë raportoi deklaratën e peshkopit.
Javët e fundit, hetuesit kanë gjetur qindra varre të pashënuar në vendet e ish-shkollave rezidenciale për fëmijë autoktonë.
Pasi u zbuluan më shumë se 600 varre në vendin e një shkolle dhe eshtrat e 215 fëmijëve, publiku kanadez dhe kryeministri Justin Trudeau kërkuan një falje papale.
Në fillim të qershorit, Papa Françesku shprehu dhimbje për zbulimin e eshtrave të fëmijëve dhe u bëri thirrje zyrtarëve fetarë dhe politikë të “hedhin dritë mbi ngjarjen e trishtuar”.
Në Kanada, nga shekulli i 19-të deri në vitet 1970, më shumë se 150,000 fëmijë autoktonë u dërguan me forcë në shkollat rezidenciale të drejtuara nga kisha, të krijuara me qëllim të asimilimit të detyruar në shoqërinë kanadeze. /tesheshi.com/
