9.9 C
Pristina
Sunday, February 25, 2024

Turqia mbështet anëtarësimin e Kosovës në Këshill të Evropës dhe në NATO

Më të lexuarat

Kryetari i Kuvendit të Republikës së Kosovës, Glauk Konjufca, ka takuar sot ambasadorin e ri të Republikës së Turqisë në Kosovë, Sabri Tunç Angılı, ndërkaq ky i fundit konfirmoi mbështetjen e shtetit turk për anëtarësim në Këshill të Evropës dhe në NATO.

Konjufca uroi ambasadorin Angılı për detyrën e re dhe vuri në dukje se marrëdhëniet mes Republikës së Kosovës dhe Republikës së Turqisë janë shumë të mira e se ato bazohen në miqësi të kamotshme, partneritet strategjik dhe respekt të ndërsjellë.

Gjithashtu i shprehu ngushëllime për viktimat e tërmeteve që goditën Turqinë, duke theksuar se populli i Kosovës qëndron pranë popullit turk në këto ditë të vështira.

Kryetari i Kuvendit vlerësoi lart mbështetjen e vazhdueshme që ky vend mik i ka dhënë dhe vazhdon t’i japë shtetit të Kosovës.

Ambasadori Angılı e falënderoi Kryetarin e Kuvendit për pritjen dhe njëherësh ritheksoi vazhdimin e përkrahjes së Turqisë për anëtarësimin e Kosovës në Këshillin e Evropës dhe në NATO, por edhe në institucione dhe organizma tjerë ndërkombëtarë.

Kryetari Konjufca dhe ambasadori Angılı shprehën gatishmërinë për intensifikimin e bashkëpunimit të gjithanshëm dhe forcimin e mëtejshëm të marrëdhënieve dypalëshe ndërmjet Republikës së Kosovës dhe Republikës së Turqisë.  /Telegrafi/

- Advertisement -spot_img

Më tepër

Të fundit