Sipas një analize ekskluzive të gazetës “The Muslim News”, në zgjedhjet e fundit lokale në Angli janë zgjedhur 467 anëtarë muslimanë në këshillat lokalë në mbarë vendin. Ky është një numër rekord dhe përbën një zhvillim të rëndësishëm në përfaqësimin politik të muslimanëve britanikë, duke sinjalizuar gjithashtu një riorganizim të mënyrës së votimit të muslimanëve për herë të parë pas shumë dekadash.
Të dhënat tregojnë se rreth 2.076 kandidatë muslimanë garuan për vende në këshillat e qarqeve, lagjeve londineze, bashkive urbane dhe autoriteteve të unifikuara lokale.
Partia Laburiste (Labour Party) siguroi zgjedhjen e 199 anëtarëve muslimanë në këshillat lokalë, që përbëjnë 42.6% të të gjithë anëtarëve muslimanë të zgjedhur. Kjo e mban Partinë Laburiste si forcën më të madhe politike që përfaqëson muslimanët, megjithëse ky numër fsheh humbje të konsiderueshme në disa prej bastioneve tradicionale urbane, ku marrëdhënia mes partisë dhe votuesve muslimanë nuk konsiderohet më e garantuar si dikur.
Ajo që bie më shumë në sy në këto rezultate është suksesi i kandidatëve të pavarur. 91 kandidatë muslimanë të pavarur fituan vende në këshillat lokalë, duke përbërë afërsisht një të pestën e të gjithë anëtarëve muslimanë të zgjedhur. Shumë prej këtyre fitoreve u arritën falë fushatave lokale të organizuara në nivel komuniteti, të mbështetura kryesisht nga rrjetet sociale, WhatsApp-i, mobilizimi shoqëror dhe komunikimi dixhital, të koordinuara nga organizata si “The Muslim Vote” (Zëri i Muslimanëve).
Ndërkohë, Partia e Gjelbër (Green Party) arriti të zgjedhë 60 anëtarë muslimanë, që përfaqësojnë 12.8% të të gjithë anëtarëve muslimanë të zgjedhur, duke u bërë kështu partia e tretë më e madhe për nga numri i kandidatëve muslimanë fitues.
Një prej rezultateve më të papritura ishte zgjedhja e 12 anëtarëve muslimanë që përfaqësojnë partinë “Reform UK”, një parti e djathtë që njihet për qëndrimet e saj të ashpra kundër emigracionit.
Analiza e gazetës “The Muslim News” tregon se komuniteti musliman në Britani po kalon një fazë tranzicioni politik. Dominimi tradicional i Partisë Laburiste mbi votuesit muslimanë – i ndërtuar ndër dekada mbi lidhjet me emigracionin, klasën punëtore dhe rrjetet komunitare – nuk është më i garantuar. Megjithëse Laburistët vazhdojnë të kenë numrin më të madh të anëtarëve muslimanë në këshillat lokalë, ata tashmë përballen me konkurrencë serioze nga kandidatët e pavarur, Partia e Gjelbër dhe Liberal Demokratët, ndërsa edhe “Reform UK” ka filluar të shfaqet në këtë debat.
Me më shumë se 1.000 kandidatë muslimanë në garë dhe me 467 fitues në 78 këshilla lokale, zgjedhjet lokale të vitit 2026 përfaqësojnë kulmin e pjesëmarrjes politike të muslimanëve në Angli deri më sot.
