31.5 C
Pristina
Thursday, June 30, 2022

Rama pas reagimit të Bullgarisë: Miqtë e vërtetë nuk dëmtojnë njëri-tjetrin, hiqni veton, ose më duroni!

Më të lexuarat

Kryeministri i Shqipërisë, Edi Rama i është kundërpërgjigjur menjëherë deklaratës së Ministrisë së Jashtme të Bullgarisë, e cila i bën vërejtje Ramës për përdorimin e gjuhës pas reagimeve të tij një ditë më parë në Bruksel ku kritikoi veton bullgare për Maqedoninë e Veriut që njëkohësisht pengoi nisjen e negociatave edhe për Shqipërinë.

Në një reagim në Twitter, Rama ka thënë se mënyra e përdorur nga Bullgaria për të zgjidhur një çështje dypalëshe është problem.

“Oh! Ministria e Jashtme e Bullgarisë ka problem me mënyrën time të të folurit. E drejtë. Edhe unë kam një problem me mënyrën se si Bullgaria dëshiron të zgjidhë çështjet dypalëshe duke përdorur procesin e zgjerimit si mjet për të marrë peng dy vende të NATO-s. Qetësohuni miq: Hiqni veton, ose më duroni!”, shkroi Rama në Twitter.

“Dhe meqë ra fjala, më lini t’iu kujtoj miq të vyer bullgar se u desh një telefonatë e shkurtër me Boyko Borissov për të zgjidhur në mënyrë miqësore dhe të ndershme çështjen e pakicës bullgare në Shqipëri. Miqtë e vërtetë nuk i bëjnë dëm njëri-tjetrit, por flasin sinqerisht dhe gjejnë fjalën e përbashkët”, ka shtuar Rama.

Në një njoftim për shtyp, Ministria e Jashtme Bullgare është shprehur se “Bullgaria gjithmonë ka qenë mes shteteve anëtare të BE-së që ka mbështetur integrimin e popullit shqiptar”.

“Nuk është hera e parë që kemi dëgjuar ofendime të pamerituara nga kreu i një qeverie. Një gjuhë e tillë nuk mund të justifikohet. Presim që Kryeministri i Shqipërisë të moderojë gjuhën, duke e bërë të përshtatshme për politikanin e një vendi kandidat për në BE,” thuhet në reagim. /Telegrafi/

- Advertisement -spot_img

Më tepër

Të fundit