Në një fjalim të mbajtur gjatë këtij iftari, Rama uroi besimtarët muslimanë në të gjithë Shqipërinë për muajin e bekuar të Ramazanit.
Kryeministri I Shqipërisë, Edi Rama, ka shtruar sonte një iftar për nder të muajit të madhërishëm të Ramazanit, në ambientet e Kryeministrisë, ku të ftuar ishin përfaqësues të trupit diplomatik të akredituar në Tiranë, personalitete fetare, drejtues të OJF-ve, politikanë, gazetarë dhe të tjerë të ftuar, raporton Anadolu Agency (AA).
Në një fjalim të mbajtur gjatë këtij iftari, Rama uroi besimtarët muslimanë në të gjithë Shqipërinë për muajin e bekuar të Ramazanit.
Duke sjellë disa shembuj nga feja, Rama ka krahasuar dhe vënë theksin tek një drejtësi e munguar në Shqipëri si dhe theksoi se drejtësia është e vetmja rrugë e ndërtimit të një shteti solid.
Kryeministri Rama ndër të tjera nuk la pa përmendur edhe vendimin e popullit britanik në referendumin për ndarjen nga BE-ja.
Duke e lidhur atë me drejtësinë në Shqipëri ai tha: ”S’jemi vetëm, pasi pavarësisht se si ka përfunduar ”martesa” e brishtë e Britanisë së Madhe me Bashkimin Evropian, për ne shqiptarët është fat i historisë të jemi sot bashkë me BE-në në rrugëtimin e mundimshëm për të ndërtuar një drejtësi të drejtë. Sepse për Shqipërinë rruga drejt BE-së nuk është rruga e një shteti solid siç ishte Britania e Madhe kur ju bashkua Europës politike, por rruga e një populli që vetëm përmes drejtësisë mund të ndërtojë një shtet solid.”
