Mediat e Kremlinit na thonë se çdo gjë që dimë mbi Sirinë është pjesë e një komploti botëror dhe se asgjë nuk është e vërtetë. Por çfarë thonë faktet për këtë?
Komplotistët pro-Asad dhe filo-Rus, të cilët nuk mungojnë as në Shqiperi, po na deklarojnë se çdo gjë që dime rreth Sirisë është e gabuar. Se ne qenkemi mashtruar e keqinformuar nga mediat mainstream, që nga New York Times te Der Spiegel, nga The Guardian te The Telegraph, nga CNN te Channel 4, nga ABC te BBC, nga CBS te CBS. Se organizatat e të drejtave të njeriut si Mjekët për të Drejtat e Njeriut (Physicians for Human Rights), Mjekët Pa Kufi (Medicins Sans Frontiers), Amensty International dhe Human Rights Watch, agjencitë ndërkombëtare si OKB-ja etj., të gjitha na qenkan pjesë e një plani të madh konspirativ kundër Bashar al Assadit. Dhe se e vërteta mund të zbulohet vetëm me anë të mediave “alternative” si RT (Russia Today) e Kremilinit.
Por, ajo që po ndodh në Siri nuk është mister. Faktet janë të qarta si kristali. Informacionet nga atje vijnë nga organizata të shumta ndërkombëtare të pavarura. Ata që i mohojnë këto e bëjnë vetëm se nuk duan t’i besojnë, pasi nuk përshtaten me bindjet e tyre, ose i shërbejnë një ideologjie të caktuar. Bindje të tilla të gabuara përforcohen nga burimi kryesor i dizinformimit në pronësi të Kremlinit, RT. Qëllimi është që të fusin dyshime të njerëzit, të ushqejnë cinizmin dhe t’i hutojnë në lidhje me ato që dinë. E duke qenë se Rusia është ndër përgjegjësit kryesorë të asaj që po ndodh në Sir, ajo do të bëjë gjithçka për të ofruar një narrativë tjetër.
Sigurisht, dhe mediat perëndimore kanë problemet e tyre në raportim. Kanë dështuar të raportojnë mbi mizoritë në Gaza, kanë qenë tmerrësisht të njëanshme gjatë luftës së Irakut. Sidoqoftë, nuk duhet të bëjmë gabimin e madh e të krahasojmë fjala bie BBC-në me RT. Kur kanë guxuar ndonjëherë gazetarët e Russia Today t’i kërkojnë llogari Putinit siç ka bërë BBC me Tony Blair-in, apo Channel 4 me David Cameroon?!
Vlerësimet e Rrjetit Sirian për të Drejtat e Njeriut tregojnë se regjimi i Asadit dhe Rusia janë përgjegjës për 95 për qind të civilëve të vrarë.
Faktet rreth ngjarjeve në Siri flasin vetë, përtej çdo propagande mediatike.
Sipas Qendrës Siriane për Kërkime Politike (SCPR), rreth 470 mijë vetë kanë vdekur në këtë konflikt. Vlerësimet e Rrjetit Sirian për të Drejtat e Njeriut tregojnë se regjimi i Asadit dhe Rusia janë përgjegjës për 95 për qind të civilëve të vrarë. Komisioni Hetimor i OKB-së për Luftën në Siri e ka paditur regjimin e Asadit për “krime kundër njerëzimit, tortura, burgosje, zhdukje dhe akte të tjera çnjerëzore”.
Rusia, aleati kryesor i Sirisë, është akuzuar nga Amnesty International për krime luftë, përfshirë shënjestrimin e qëllimshem të civilëve dhe mjekëve. Komisioni Hetimor i OKB-së e ka akuzuar regjimin e Asadit për përdorimin e urisë si armë lufte dhe për “shkatërrimin e qëllimshem të infrastrukturave shëndetësore”. Mjekët Pa Kufi (MSF) kanë raportuar se ka pasur 94 bombardime në 63 strukturat e tyre mjekësore. Një dëshmitar nga ushtria siriane ka ofruar prova të fotografuara ku të paktën 6,786 të burgosur janë vrarë nga torturat e regjimit.
Pa harruar sulmin me armë kimike në gusht të vitit 2013, i cili vrau më shumë se 1,400 civilë. Hetimet e kryera nga Këshilli i OKB-së për të Drejtat e Njeriut kanë zbuluar se regjimi i Asadit ishte përgjegjës për tetë nga nëntë masakrat e kryera deri në atë kohë. Gjithashtu, që kur ka hyrë në loje, Rusia ia ka kaluar regjimit me numrin e të vrarëve. Po ashtu ka ndihmuar ISIS-in që të zgjerojë më tej territorin e tij duke shënjestruar rebelët që luftonin kundër organizatës terroriste./observer.al/
