Denoncon Beogradin, por ngre lart Athinën si “lider rajonal”
Kyeministri i Kosovës, Albin Kurti, foli në Forumin e 7-të Ekonomik Delphi në Greqi, ku, nën hijen e luftës në Ukrainë, tha se “BE është projekti më i rëndësishëm i paqes dhe prosperitetit – jo vetëm në Evropë – që nga Lufta e Dytë Botërore,”, duke theksuar se “Evropa është kontinenti ynë dhe BE është fati ynë”.
Kurti theksoi se anëtarësimi i gjashtë vendeve të Ballkanit Perëndimor në Bashkimin Evropian do të ndihmonte në forcimin e sigurisë evropiane, duke shtuar se “do të ishte reciprokisht e dobishme”.
Lidhur me bisedimet Prishtinë-Beograd, ai vuri në dukje se “ato nuk janë të lehta por duhet të vazhdohen”, duke theksuar se ato janë të vështira sepse “nga njëra anë, krimet e regjimit të Millosheviçit nuk njihen”, dhe se nga ana tjetër, “Serbia nuk ka treguar keqardhje apo pendim për këto krime”.
“Mosnjohja e pavarësisë së Kosovës dhe mosnjohja e krimeve të Milloshevicit janë dy anët e së njëjtës medalje”, tha Kurti.
Për marrëdhëniet e Kosovës me Greqinë, z. Kurti theksoi: “Kemi komunikim dhe bashkëpunim të mirë me Greqinë. Qytetarët dhe qeveritë e Kosovës dhe Greqisë nuk kanë çështje të hapura. Ekziston, pra, një urë, të cilën duhet ta kalojmë. Është një kohë e mirë që Greqia të njohë Kosovën dhe para kësaj dhe veçanërisht menjëherë pas mund të rrisim bashkëpunimin tonë ekonomik. Greqia është një lider rajonal dhe mund të ndihmojë Kosovën të fitojë më shumë njohje”.
Lidhur me luftën në Ukrainë, ai theksoi se Kosova e dënoi pushtimin rus që nga dita e parë, ndërsa hodhi poshtë çdo përpjekje për të krahasuar apo korreluar atë që është bërë në Kosovë me atë që po ndodh aktualisht në Ukrainë. “Nuk ka krahasim mes ‘Pranverës ‘99 në Kosovë dhe ‘Pranverës 2022 në Ukrainë’”, tha ai.
“Lufta duhet të përfundojë sa më shpejt dhe kjo është arsyeja pse ne duhet të ndihmojmë ukrainasit. Ne duhet të ndihmojmë në luftën e tyre çlirimtare. Do të kemi fundin e luftës kur të fitojë Ukraina. Unë nuk shoh ndonjë mënyrë tjetër për t’i dhënë fund kësaj lufte përveç dominimit të plotë të Ukrainës.” /tesheshi.com/
