Arrihet marrëveshja për financimin e Ukrainës: 90 miliard borxh
Pas 15 orësh bisedimesh në Bruksel, samiti i BE-së arriti një marrëveshje për një kredi prej 90 miliardë eurosh për Ukrainën.
“Vendimi për të ndarë 90 miliardë euro për të mbështetur Ukrainën për vitet 2026-2027 është miratuar. Ne e kemi mbajtur angazhimin tonë”, shkroi Presidenti i Këshillit Evropian, Antonio Costa.
Paratë do të mblidhen përmes huamarrjes së përbashkët midis 24 prej 27 vendeve të BE-së, por të gjithë duhej të bien dakord për planin sepse ai është i garantuar nga buxheti qendror afatgjatë i BE-së.
Të gjitha vendet e BE-së, përveç Republikës Çeke, Hungarisë dhe Sllovakisë, do të bashkohen dhe do të mbledhin 90 miliardë euro borxh të përbashkët, të mbështetur nga buxheti i BE-së. Këto para do t’i jepen hua Ukrainës gjatë dy viteve të ardhshme.
Kievi do të përdorë më pas dëmshpërblimet e ardhshme të luftës ruse për të shlyer dëmet ndaj BE-së. Dhe nëse Rusia refuzon të paguajë paratë, “Bashkimi rezervon të drejtën për të përdorur” asetet e saj të ngrira shtetërore për të shlyer kredinë”, shkruan udhëheqësit e BE-së në përfundimet e samitit, në deklaratën e përbashkët që vendet lëshuan në fund të bisedimeve.
Kancelari gjerman Friedrich Merz tha se asetet e ngrira të Rusisë në Evropë do të përdoren për të shlyer kredinë ndaj Ukrainës, nëse Rusia nuk vendos ta bëjë këtë vullnetarisht kur të përfundojë lufta në Ukrainë.
“Asetet e ngrira ruse do të mbeten të ngrira derisa Rusia t’i paguajë dëmshpërblimet Ukrainës”, tha ai. “Ukraina duhet ta shlyejë kredinë vetëm pasi Rusia të paguajë dëmshpërblimet. Dhe ne e bëjmë shumë të qartë: Nëse Rusia nuk i paguan dëmshpërblimet, ne do t’i përdorim në përputhje të plotë me ligjin ndërkombëtar.”
“Unë supozoj se paratë do të jenë të disponueshme në gjysmën e dytë të janarit më së voni”, tha kancelari gjerman kur u pyet se kur kredia shumëmiliardë euro do të vihej në dispozicion të Kievit. Paratë do ta mbajnë vendin mbi ujë për dy vitet e ardhshme, tha Merz, duke shtuar se marrëveshja e udhëheqësve të BE-së është “lajm i mirë për Ukrainën dhe lajm i keq për Rusinë”. /tesheshi.com/
