Zhvillime që po reflektohen te çmimet në ngritje
Shtetet e Bashkuara dhe partnerët evropianë po shqyrtojnë një ndalim të importeve të naftës ruse, tha sekretari amerikan i shtetit Antony Blinken, duke theksuar rëndësinë e një furnizimi të qëndrueshëm global të naftës, raporton Reuters.
“Unë jam në bisedime shumë aktive me partnerët tanë evropianë për ndalimin e importit të naftës ruse në vendet tona, duke ruajtur në të njëjtën kohë një furnizim të qëndrueshëm global të naftës,” tha Blinken në një intervistë për NBC.
Blinken, i cili po viziton vendet evropiane për të koordinuar reagimin ndaj pushtimit rus të Ukrainës me partnerët e tij, shtoi se kishte diskutuar për importet e naftës me presidentin Joe Biden dhe kabinetin e tij.
Blinken e komentoi këtë pasi çmimet e naftës u rritën ndjeshëm këto ditë pasi Shtetet e Bashkuara dhe aleatët e saj vendosën sanksione ndaj Rusisë për shkak të pushtimit të Ukrainës.
Pas pushtimit, Shtëpia e Bardhë vendosi sanksione ndaj eksporteve të teknologjisë drejt rafinerive ruse dhe gazsjellësit Nord Stream 2, i cili nuk filloi kurrë operimin.
Deri më tani, ajo nuk ka synuar naftën dhe gazin rus, pasi administrata Biden ende po peshon ndikimin e një vendimi të tillë në tregun global të naftës dhe çmimet e energjisë në Shtetet e Bashkuara.
I pyetur nëse Shtetet e Bashkuara kishin hedhur poshtë mundësinë e një ndalimi të njëanshëm të importeve të naftës ruse, Blinken tha se nuk do të refuzonte asgjë, por se në gjithçka që po bën Uashingtoni, “qasja fillon me koordinimin me aleatët dhe partnerët”.
Amerikanët janë konsumatorët më të mëdhenj në botë të produkteve të naftës falë makinave të mëdha, distancave të gjata dhe transportit të vogël publik në disa zona. Rritja e çmimeve të naftës ka qenë gjithmonë një çështje e ndjeshme për politikanët amerikanë. /tesheshi.com/
