Ministri aktual amerikan i Mbrojtjes, Pete Hegseth, e përmbledh vizionin e tij për Islamin në librin e tij “Fushata Kryqëzate Amerikane” botuar në vitin 2020, duke thënë:
“Islami nuk është fe paqeje dhe as fe dhune; ai është fe e nënshtrimit. Fjala ‘Islam’ vetë do të thotë nënshtrim ndaj Zotit, nënshtrim ndaj Librit të Zotit dhe ndaj Sunetit të Profetit Muhamed, siç është përcjellë në hadithe. Për ata që ndjekin fenë me përpikëri, teksti i Kuranit dhe mësimet e Profetit Muhamed janë të pagabueshme dhe të pakundërshtueshme, gjë që e bën tekstin islam sfidën e vërtetë.
Për ta bërë situatën edhe më të ndërlikuar, Islami nuk është vetëm fe, por gjithashtu një sistem qeverisës i bazuar në Sheriatin Islam në format e tij të ndryshme, një sistem gjyqësor dhe penal, dhe një stil jetese kulturor për myslimanët e devotshëm. Kjo do të thotë se islamizmi, si dhe islami politik dominues, nuk mund të bashkëjetojnë paqësisht me ndonjë sistem tjetër qeverisës.
Islamistët kanë një libër, një trashëgimi, një udhëheqës dhe një narrativë të vendosur që prej 1400 vitesh.
Amerika ka një histori të gjatë me islamizmin. Siç shkroi miku dhe kolegu im në kanalin Fox & Friends, Brian Kilmeade, në librin e tij më të shitur “Thomas Jefferson dhe Piratët e Tripolit: Lufta e harruar që ndryshoi historinë amerikane”, në fund të shekullit XVIII, anijet tregtare amerikane u sulmuan nga piratë myslimanë të Afrikës së Veriut, të cilët vazhdimisht kapnin marinarët tanë dhe i mbanin si skllevër.
Diplomatët i thanë Thomas Jefferson-it dhe John Adams-it se sulmuesit besonin se ‘Kurani përcakton se të gjitha kombet që nuk njohin sovranitetin e tyre janë mëkatare… dhe se çdo mysliman që vritet në betejë hyn në parajsë patjetër’. John Adams tha: “Nuk duhet t’i luftojmë ata kurrë, përveç nëse vendosim t’i luftojmë përgjithmonë”. Dhe ai kishte të drejtë në gjithçka që tha. Amerika i luftoi atëherë dhe fitoi kundër tyre – dhe ende i luftojmë sot.
Ministri aktual i Mbrojtjes, Pete Hegseth, në librin Fushata Kryqëzate Amerikane, flet edhe për arsyet e mbështetjes amerikane për Izraelin:
“Ju mund të pyesni: Unë jetoj në Shtetet e Bashkuara – pse konsiderohet Izraeli si vija e parë e frontit?
Thjesht: Nëse nuk kupton rëndësinë e Izraelit dhe rolin e tij qendror në historinë e qytetërimit perëndimor – dhe Amerika është shprehja më e lartë e këtij qytetërimi – atëherë nuk e njeh historinë. Historia e Amerikës është e lidhur ngushtë me historinë judeo-kristiane dhe shtetin modern të Izraelit.
Nëse e do Amerikën, duhet ta duash edhe Izraelin… Zoti qëndron me popullin e Izraelit kundër armiqve të tyre dhe i bekon ata që e bekojnë Izraelin… Vijat e frontit për Amerikën janë vijat e frontit për besimin tonë – Jerusalemi dhe Izraeli.
Ne të krishterët, bashkë me miqtë tanë hebrenj dhe ushtrinë e tyre të fuqishme në Izrael… duhet ta shtyjmë islamizmin prapa – në mënyrë kulturore, politike, gjeografike… dhe ushtarake.”
“Po të mos ishin luftërat kryqëzate, nuk do të kishte reformë protestante apo rilindje. Nuk do të kishte Evropë e as Amerikë.
Islami e riformësoi Lindjen e Mesme, pushtoi Afrikën e Veriut dhe ishte afër të përfshinte të gjithë Evropën. Fatmirësisht… luftërat kryqëzate e ngadalësuan përparimin e tij.
Mbreti polak, Jan Sobieski III, komandanti suprem i ushtrisë aleate kristiane dhe kalorësit e tij, mposhtën ushtrinë islame të Perandorisë Osmane, duke i dhënë fund marshimit të Islamit drejt Evropës. Po të kishte rënë Vjena, myslimanët do të kishin marshuar deri në Vatikan dhe do ta kishin shndërruar në xhami.
Polakët shpëtuan qytetërimin perëndimor dhe krishterimin evropian. Ndërsa të krishterët e Afrikës së Veriut, si persët dhe gjysma e Indisë, ranë në grackën e Islamit dhe nuk u kthyen më kurrë prej tij.”
/Ahmed Mawlana/
