Islami, si një sistem universal për njerëzit ofron drejtësi në çdo aspekt, dhe njëra prej tyre është barazia e njerëzve.
Përkundër këtij fakti, politikanët në Bosnje, në praktikë kanë treguar se nuk janë të barabartë me popullatën “e zakonshme” as gjatë faljes së namazit të Bajramit.
Anëtari i Presidencës së Bosnjes, Bakir Izetbegoviç, Kryetari i Këshillit të Ministrave, Denis Zvizdiç dhe Kryeministri Fadil Novaliç, në ditën e parë të Kurban Bajramit kishin një trajtim të veçantë në xhaminë e Gazi Husrev-beg në Sarajevë, ku u mbajt ceremonia qendrore e festës së Bajramit.
Një foto që po përhapet në rrjetet sociale, tregon zyrtarët shtetërorë të ulur në një xhami, të ndarë nga besimtarët e tjerë përmes shtyllave të lidhura përmes një litari.
Një trajtim i tillë ka shkaktuar reagime të forta te publiku boshnjak, i cili porositi politikanët që barazia më e madhe e myslimanëve duhet të shihet në namaz.
Nuk kanë munguar as kritikat ndaj Bashkësisë Islame, pasi organizimi i ceremonisë së Bajramit në Bosnje ishte kompetencë e saj.
Në mënyrë simbolike, Reisul-ulama Hussein ef. Kavazoviç tha se në të gjitha ritualet e përshkruara për ne, Allahu na mëson se solidariteti, lidhjet vëllazërore, dashuria dhe barazia reciproke janë baza e zhvillimit dhe prosperitetit të komunitetit. /tesheshi.com/
