Dritë nga psikiatria moderne
Ka ditë kur zemra lodhet dhe shpirti hesht.
Kur trupi endet nëpër hijet e ankthit, dhe mendja humbet në mjegullën e trishtimit.
Por, edhe në errësirë, ka dritë dhe ajo dritë vjen nga shkenca, shërimi dhe besimi se njeriu mund të ngrihet sërish.
Këto nuk janë vetëm fjalë ngushëlluese.
Janë shifra reale, që flasin për shpresë dhe rilindje.
1. Depresioni nuk është fundi
Rreth 70% e njerëzve me depresion përmirësohen dukshëm brenda tre muajve të parë të trajtimit.
Terapia apo ilaçet nuk janë shenjë dobësie janë urë drejt dritës.
2. Ankthi mund të mësohet të heshtë
Mbi 80% e rasteve të ankthit të lehtë ose mesatar kontrollohen plotësisht me teknika frymëmarrjeje, relaksimi dhe terapi konjitive-sjellore (CBT).
Ndonjëherë, paqa fillon me një frymë të vetme të thellë.
3. Pas errësirës, jeta kthehet
90% e atyre që kanë tentuar vetëvrasje nuk e përsërisin më kurrë, nëse marrin terapi të rregullt dhe dashuri të qëndrueshme nga njerëzit përreth.
Njeriu mund të gjejë arsyen për të jetuar, kur ndien se jeta ende e do.
4. Dhimbja që rrit shpirtin
Një në katër persona që kalojnë periudha të vështira psikologjike, pas shërimit ndihen më të pjekur, më të butë, më njerëzorë.
Dhimbja shpesh është mësuesja e heshtur e zemrës.
5. Truri di të rigjenerohet
Edhe në moshën 60-vjeçare, truri krijon qeliza të reja — sidomos kur njeriu pushon mirë, ecën, lutet dhe buzëqesh.
Shërimi nuk ndodh vetëm në shpirt, por në çdo qelizë që mëson të shpresojë.
6. Kur shpirtrat shërohen bashkë
Terapia në grup e ul ndjenjën e vetmisë me 40% më shumë se terapia individuale.
Kur flet me dikë që të kupton, zemra ndien se nuk është vetëm.
7. Mirënjohja është ilaç
Dy javë me falënderime të vogla çdo ditë mund të ulin shenjat e depresionit me 25%, sipas Universitetit të Kalifornisë.
Një “Elhamdulilah”, një “Faleminderit”, një “Jam ende këtu” janë fjalë që rigjallërojnë trurin.
8. Një shëtitje për shpirtin
Ecja 30 minuta në ditë ul rrezikun e depresionit me 40%.
Sepse trupi që lëviz, e mendon më kthjellët, dhe zemra që rreh, mëson sërish të ndjejë gëzim.
9. Terapia funksionon dhe mbetet me ty
Nga çdo 10 persona që ndjekin terapi, 8 përfitojnë në mënyrë të tillë që nuk kanë më nevojë të rikthehen pas dy vitesh.
Terapia është art i njohjes së vetvetes, jo luks.
10. Dashuria shëron që në fëmijëri
Fëmijët që rriten me mbështetje emocionale dhe familjare kanë 60% më pak gjasa të vuajnë nga depresioni më vonë në jetë.
Një përqafim sot është një shpëtim për shpirtin e së nesërmes.
Mësimi i madh
Këto shifra nuk janë të thata. Janë rrëfime shprese, janë statistika që frymojnë.
Ato tregojnë se shërimi është i mundur, se mendja di të shërohet, dhe se trupi di të rilindë.
Mos i beso mendimeve që thonë “është vonë”.
Asnjëherë nuk është.
Sepse truri rigjenerohet, shpirti falet dhe drita gjithmonë kthehet.
Shkruar nga Dr. Abdulilah al-Hadithi
Përshtatur në shqip nga Koha Islame
