ANKARA (AA) – Katari mbetet në pozitën e parë kur janë në pyetje të ardhurat kombëtare për kokë banori me 129.726 dollarë për vitin e kaluar i shprehur në Barazinë e Fuqisë Blerëse (BFB) edhe pse çmimi i gazit dhe naftës ka vazhduar të jetë i ulët, raporton Anadolu Agency (AA).
Sipas informacioneve që gazetari i AA-së i ka përpiluar nga të dhënat e Fondit Monetar Ndërkombëtar (FMN) dhe Banka Botërore (BB), Katari, vendi me rezervat e tretë më të mëdha në botë të gazit dhe popullsisë prej afërsisht dy milionë e 200 mijë banorë, në vitin 2015 ka pasur të ardhura kombëtare prej 132.870 dollarë sipas BFB-së, ndërsa kjo shifër ka rënë në vitin 2016 për 3.144 dollarë, konkretisht në 129.726 dollarë. Edhe krahas rënies së të ardhurave kombëtare sipas BFB-së, Katari ka ruajtur vendin e tij në krye të listës.
Ndërkaq, në vendin e dytë sipas të ardhurave kombëtare për kokë banori në bazë të BFB-së vitin e kaluar ishte Luksemburgu, i cili rriti të ardhurat për 2.431 dollarë për ta çuar shifrën në 101.936 dollarë. Këtë shtet e ndoqën Singapori me 87.082 dollarë dhe Kuvajti me 71.263 dollarë.
Ndërkohë, pas tyre radhiten Irlanda me 69.374 dollarë, Norvegjia me 69.296 dollarë, Emiratet e Bashkuara Arabe me 67.696 dollarë, Zvicra me 59.375 dollarë, SHBA-të me 57.293 dollarë dhe Arabia Saudite me 54.078 dollarë.
Turqia, të ardhurat kombëtare për kokë banori sipas BFB-së prej 20.420 dollarë në vitin 2015 i ka ngritur në 21.146 dollarë vitin e kaluar, për t’u radhitur në vendin e 63-të në mesin e 189 shteteve.
Nga ana tjetër, shteti që është radhitur i fundit sipas të ardhurave kombëtare për kokë banori është Republika e Afrikës Qendrore me 656 dollarë në vit, të cilën e ndjekin Republika Demokratike e Kongos me 785 dollarë, Burundi me 818 dollarë, Liberia me 882 dollarë dhe Republika e Nigerit me 1.114 dollarë.
Radhitja e shteteve sipas të ardhurave kombëtare për kokë banori sipas BFB-së për vitin 2016 është si në vijim:
Të ardhurat kombëtare për kokë banori sipas Barazisë së Fuqisë Blerëse | |||
Radhitja | 2015 (dollarë) | 2016 (dollarë) | |
1 | Katari | 132.870 | 129.726 |
2 | Luksemburgu | 99.505 | 101.936 |
3 | Singapori | 85.382 | 87.082 |
4 | Kuvajti | 70.542 | 71.263 |
5 | Irlanda | 65.806 | 69.374 |
6 | Norvegjia | 68.592 | 69.296 |
7 | Emiratet e Bashkuara Arabe | 67.217 | 67.696 |
8 | Zvicra | 58.647 | 59.375 |
9 | SHBA | 56.084 | 57.293 |
10 | Arabia Saudite | 53.802 | 54.078 |
63 | Turqia | 20.420 | 21.146 |
185 | Nigeri | 1.077 | 1.114 |
186 | Liberia | 874 | 882 |
187 | Burundi | 831 | 818 |
188 | Republika Demokratike e Kongos | 767 | 785 |
189 | Republika e Afrikës Qendrore | 627 | 656 |
Sipas Entit Statistikor të Turqisë, BFB definohet si norma e kostos së shportës së mallrave dhe shërbimeve në shtete të ndryshme. Përmes saj, mënjanohen diferencat e shkallës së kostos midis shteteve dhe bëhen krahasime të realta të kostove dhe vëllimeve në aspektin ndërkombëtar.