“Një ditë e zezë për Izraelin dhe hebrenjtë”, thonë mediat izraelite
Fitorja e Zahran Mamedanit në zgjedhjet për kryetar të bashkisë së Nju Jorkut ka shkaktuar reagime të ashpra në qarqet politike dhe mediatike izraelite.
Ambasadori izraelit në OKB: “Të shqetësuar për deklaratat e tij kundër Izraelit”
Ambasadori i Izraelit në Kombet e Bashkuara, Dani Danon, deklaroi se Tel Avivi është “shumë i shqetësuar” për fitoren e Mamedanit, duke e cilësuar atë si një figurë me “qëndrime tepër të ashpra kundër Izraelit”.
Mediat izraelite: “Frikë e madhe mes hebrenjve të Nju Jorkut”
Korrespondenti i portalit izraelit Walla në Shtetet e Bashkuara, Idan Koehler, raportoi se “frika e hebrenjve të Nju Jorkut është shumë e madhe”, ndërsa pyetja kryesore tani është “çfarë do të bëjë Mamedani me deklaratat e tij të mëparshme”.
Sipas raportit, Mamedani është arrestuar pas ngjarjeve të 7 tetorit, pasi ka udhëhequr protesta dhe greva urie në mbështetje të Hamasit dhe banorëve të Gazës.
“Në ajër ndjehet një energji për ndryshim, por ajo mund të jetë tepër ekstreme,” shkruan Walla.
Kanal 14: “Një ditë e zezë për Izraelin dhe botën”
Gazetari i afërt me kryeministrin Benjamin Netanyahu, Jaakov Bardugo, i cituar nga Kanal 14, e quajti fitoren e Mamedanit “një ditë të zezë për Izraelin, për hebrenjtë dhe për mbarë botën”.
Përkrahësit e Mamedanit: “Liri për Palestinën”
Gazeta Maariv raportoi se përkrahësit e Mamedanit brohoritën “Liri për Palestinën” gjatë shpalljes së rezultatit të zgjedhjeve në Nju Jork.
Haaretz: “Izraeli duhet të reagojë në arenën ndërkombëtare”
Sipas gazetës Haaretz, pas fitores së Mamedanit, Izraeli duhet të forcojë përpjekjet në arenën ndërkombëtare për të ndikuar në opinionin global, i cili, sipas saj, është ndikuar fuqishëm nga pamjet e luftës në Rripin e Gazës që janë përhapur në mbarë botën.
